Ukrayna Prezidenti Volodimir Zelenski Rusiya Prezidenti Vladimir Putinlə telefon danışığı aparmaq və Moskvada görüşmək niyyətində olmadığını bildirib.
Bizim.Media xəbər verir ki, Zelenski bu barədə Almaniya kansleri Fridrix Mertslə Berlində keçirilən birgə mətbuat konfransında Putinin mümkün telefon danışığı təklifini şərh edərkən danışıb.
O, belə bir söhbətin heç bir perspektiv vəd etmədiyini düşünür:
“Biz bu oyunu başa düşürük. Bunun perspektivi yoxdur. Telefonla çox quru və rəsmi söhbət olacaq. Mən növbəti dəfə Rusiya liderindən tarixi mühazirələr dinləyəcəyəm, müharibəni həqiqətən başa çatdırmaq üçün real addımlar barədə isə heç nə eşitməyəcəyəm. Bu barədə sadəcə danışmaq yox, oturub razılığa gəlmək lazımdır”.
Zelenski Moskvaya getməkdə də məna görmədiyini vurğulayıb. Onun sözlərinə görə, Ukrayna Prezidentinin Rusiya paytaxtına dəvət edilməsi Putin üçün Kiyevə səfər təklif edilməsi qədər dağıdıcı xarakter daşıyır.
Qeyd edək ki, daha əvvəl Kreml Putinin heç bir ilkin şərt irəli sürmədən Zelenski ilə telefon danışığına hazır olduğunu açıqlamış və Ukrayna Prezidentini Moskvaya dəvət etdiyini bir daha təsdiqləmişdi.
Bizim.Media
