Moskva istiqamətində hərəkət məhdudlaşdırıldı - PUA hücumu var

Ukrayna Silahlı Qüvvələrinin Rusiyanın daxili regionlarına kütləvi PUA hücumu dalğası Yaroslavl vilayətində nəqliyyatın hərəkətində ciddi iflicə səbəb olub. Təhlükəsizlik tədbirləri çərçivəsində regional mərkəzdən paytaxt Moskva istiqamətinə gedən magistral yol tamamilə bağlanıb.

Bizim.Media Rusiya KİV-nə istinadən xəbər verir ki, bu barədə Yaroslavl vilayətinin qubernatoru Mixail Yevrayev rəsmi bəyanat yayıb.

Qubernator əhaliyə xəbərdarlıq edərək hazırda bölgədə gərgin vəziyyətin davam etdiyini bildirib:

"Regionumuz Ukrayna PUA-larının düşmən hücumuna məruz qalır. Təhlükəsizliyin təmin edilməsi məqsədilə Yaroslavlın çıxışında, Moskva prospekti ilə Cənub-Qərb dairəvi yolunun kəsişməsindən Moskva istiqamətinə nəqliyyatın hərəkəti tamamilə məhdudlaşdırılıb.

Vətəndaşlardan qeyd olunan istiqamətə və onun ətraf ərazilərinə səfərlərdən çəkinmələrini, yaxud bu sahədən yan keçən alternativ marşrutlar seçmələrini xahiş edirəm".

Yevrayev həmçinin əlavə edib ki, hazırda Müdafiə Nazirliyinin hava hücumundan müdafiə qüvvələri və digər güc strukturları təhlükəsizliyin təmin edilməsi üçün gücləndirilmiş iş rejimində çalışırlar. Vilayət rəhbəri sakinləri rəsmi qurumların təlimatlarına əməl etməyə və "Pilotsuz təhlükə" (hava həyəcanı) siqnalının ləğvini gözləməyə çağırıb.

Bizim.Media