Yelisey sarayında qısqanclıq: Brijit Makron gənc təcrübəçini işdən qovdurdu

Fransanın birinci xanımı Brijit Makron Yelisey sarayında "öz məqsədlərinə çatmaq üçün cazibəsindən və qadın məkrindən istifadə etməyə çalışan" gənc bir təcrübəçi qızın işdən çıxarılmasına nail olub.

Bizim.Media xəbər verir ki, bu barədə ölkənin birinci cütlüyü haqda yazılmış və artıq ilin ən çox müzakirə olunan siyasi nəşrlərindən birinə çevrilən yeni bioqrafik kitabda bəhs edilir.

Söhbət jurnalist Florian Tardifin işıq üzü görən kimi Fransada bestsellerə çevrilən "Un Couple (Presque) Parfait" ("Demək olar ki, ideal cütlük") kitabından gedir. Müəllif iddia edir ki, Fransa liderinin nümunəvi ailə imicinin arxasında gərgin münasibətlər, qısqanclıq və daxili münaqişələr gizlənir.

Hanoy hava limanındakı qalmaqalın pərdəarxası

Kitabın təqdimatı ilə bağlı radioda çıxış edən Tardif bildirib ki, ötən ilin mayında Hanoy hava limanında (Vyetnam) baş verən və bütün dünyanın gündəmini zəbt edən qalmaqallı videonun əsl səbəbini bilir. Həmin görüntülərdə Brijit Makron təyyarədən düşməzdən əvvəl Fransa prezidentinin üzünə sərt şəkildə sillə vurmuşdu.

Jurnalistin sözlərinə görə, davanın səbəbi Emmanuel Makronun telefonuna tanınmış iranlı aktrisa Qolşiftə Fərəhanidən gələn mesaj olub. İddia edilir ki, Fransa lideri aktrisa ilə yazışmasında ona "gözəl" (jolie) və "möhtəşəm" (magnifique) sözləri ilə xitab edib və aylarla davam edən bu "platonik münasibət" təyyarə göyərtəsində emosional mübahisəyə yol açıb.

Kadr seçimində birinci xanımın "veto" hüququ

Kitabda qeyd olunur ki, bu, birinci xanımın həyat yoldaşına çox yaxınlaşan qadınlara qarşı ilk kəskin reaksiyası deyil. Brijit Makronun yaxın ətrafından birinin Tardifə verdiyi məlumata görə, 73 yaşlı birinci xanım kitabda "Şəhrizad" adı ilə qeyd olunan 20 yaşlı gənc təcrübəçinin saraydan uzaqlaşdırılmasını sürətləndirib. Rəsmi şəxslərdən birinin sözlərinə görə, gənc qız Yelisey sarayında işə düzəlmək üçün prezidenti "özünə tərəf çəkməyə" çalışırmış. Müəllif iddia edir ki, Brijit Makron bundan bir neçə il sonra prezidentin ətrafındakı daha bir qadın məsləhətçini də "sıradan çıxarıb".

Tardif "Les Grandes Gueules" proqramının efirində bəyan edib ki, Yelisey sarayında işləmək istəyən namizədlər son müsahibəni məhz birinci xanımdan keçirlər:

"Son mərhələdə müsahibəni birinci xanım aparır. O, belə məsələlərdə olduqca ehtiyatlı və həssasdır". Jurnalistin sözlərinə görə, Brijit Makron hətta məsləhətçilərdən birinin telefonunda şəklini gördüyü qadın namizədin işə qəbuluna "Xeyr, bu qadın bura addım ata bilməz" deyərək mane olub.

Yelisey sarayının və aktrisanın reaksiyası

Qalmaqallı mövzu ilə bağlı tərəflərin mövqeyi isə fərqlidir:

Yelisey sarayı: Hadisə ilk baş verəndə rəsmi rəsmilər bunun rəsmi səfər öncəsi cütlük arasında sadəcə zarafatyanı bir çəkişmə olduğunu bildirmişdilər. Brijit Makronun ətrafı isə iranlı aktrisa ilə bağlı iddiaları qəti şəkildə təkzib edərək, birinci xanımın heç vaxt həyat yoldaşının telefonunu yoxlamadığını vurğulayıb.

Qolşiftə Fərəhani: Hazırda beynəlxalq filmlərdə hicab geyinməkdən imtina etdiyi üçün mühacirətdə yaşayan 42 yaşlı iranlı aktrisa Makronla bağlı şayiələri rədd edib: "Bu şayiələr dalğalar halında gəlir və gedir. Məni bu narahat etmir. İnsanların sevgisi çatışmır və onlar bu boşluğu doldurmaq üçün belə romanlar uydururlar".

Buna baxmayaraq, kitabın müəllifi Florian Tardif məlumatların tamamilə yoxlanılmış faktlara və prezidentin ən yaxın ətrafının ifadələrinə əsaslandığını israr edir.

Bizim.Media