Roma Papası XIV Leo pontifikatının ilk ilində təkcə açıqlamaları ilə deyil, geyim tərzi ilə də dünyanın diqqətini çəkib.
Bizim.Media xəbər verir ki, pontifik ənənəvi papa libasları ilə yanaşı, bəzən gözlənilməz müasir detallarla da gündəmə gəlib.
Onun liturgik geyimin üzərindən “Chicago White Sox” beysbol komandasının kepkasını taxması da geniş müzakirə doğurmuşdu. Papa XIV Leonun həmin kepkanı Vatikan tədbirində taxdığı barədə daha əvvəl “People” nəşri də yazıb.
“Vogue” jurnalı isə Papa XIV Levi 2025-ci ilin ən zövqlü geyinən şəxsləri siyahısına daxil edib. Nəşr onun xüsusilə papa seçildikdən sonra Müqəddəs Pyotr bazilikasının eyvanında ilk çıxışı zamanı geyindiyi ənənəvi papa libasını qeyd edib.
Pontifikin vizual obrazının arxasında italiyalı dizayner Filippo Sorçinelli dayanır. O, bundan əvvəl Papa Fransisk və Papa XVI Benedikt üçün də liturgik geyimlər hazırlayıb. Cənubi Çin səhər nəşrinin məlumatına görə, Sorçinelli hazırda Papa XIV Leonun geyim üslubunun formalaşmasında da iştirak edir.
“Daily Mail”ə danışan Sorçinelli bildirib ki, onun işi moda və şəxsi zövqlə bağlı deyil. Dizaynerin sözlərinə görə, papa geyimi ilk növbədə hakimiyyət, simvolika və dünyaya ötürülən mesajdır.
O qeyd edib ki, papa qarderobunun hər bir detalı görüntü naminə deyil, obrazın sabitliyini və mənasını gücləndirmək üçün hazırlanır:
“Burada tamaşaçılığa yönəlmiş heç nə yoxdur. Hər vizual seçim etibarlılıq, tarazlıq və sakit nüfuz dilini formalaşdırır”.
Başqa sözlə, geyimlər artıq diqqət cəlb etmək üçün deyil, təmkinli, ciddi və inamlı təsir bağışlamaq üçün seçilir.
Sorçinelli Papa XIV Leonun üslubunu “ölçü hissindən doğan tərz” adlandırıb. Onun sözlərinə görə, bu obrazda sakit duruş, daxili nizam və nüfuz hiss olunur.
Dizayner bu yanaşmanı “səssiz ilahiyyat” kimi xarakterizə edib. Onun fikrincə, parça, rəng və forma sadəcə bəzək elementi deyil, məna daşıyıcısıdır.
“Parçalar, rənglər və formalar səssiz ilahiyyatın alətlərinə çevrilir”, - deyə Sorçinelli bildirib.
Onun sözlərinə görə, hər bir detalın məqsədi Papanın rolundan diqqəti yayındırmaq deyil, əksinə, bu rolun simvolik əhəmiyyətini gücləndirməkdir.
Papa XIV Leo bu baxımdan klassik papa ənənəsini davam etdirir. Onun geyimlərində dəqiq biçim, strukturlaşdırılmış liturgik libaslar və qol düymələri kimi detallar ön plana çıxır. Bununla yanaşı, pontifik bəzən müasir elementlərdən də istifadə edir. Məsələn, o, “Apple Watch” və “Chicago White Sox” kepkası ilə də görüntülənib.
Sorçinelli bildirib ki, o, Papa ilə birbaşa işləmir. Bütün qərarlar Vatikanın Liturgik Mərasimlər İdarəsi vasitəsilə qəbul olunur. Həmin qurum geyimlərin ənənəyə və kilsə qaydalarına uyğunluğuna nəzarət edir, rəngləri, parçaları və simvolikanı liturgik təqvimə əsasən müəyyənləşdirir.
“Hər pontifik, hər keşiş kimi, simvollar kainatıdır. Onun bədəni görünən sözə çevrilir və bu söz missiyasını əks etdirən forma və rənglərlə geyindirilməlidir”, - deyə dizayner vurğulayıb.
Sorçinelli fərqli papaların üslubunu da müqayisə edib. Onun sözlərinə görə, Papa XVI Benedikt ənənəyə və tarixi davamlılığa bağlı idi. Papa Fransisk isə sadəliyi seçmişdi.
“XVI Benedikt köklərin və ənənənin mədəniyyətini ifadə edirdi. Fransisk isə sadə, demək olar ki, provokativ yevangelik təvazökarlığın gücünü seçdi”, - deyə o bildirib.
Dizaynerin fikrincə, Papa XIV Leo ənənə ilə yenilənmə arasında orta mövqe tutur.
“O, hər şeyi mərkəzə — Məsihə qaytarmağa çalışır və bunu keçmişlə gələcəyi birləşdirən nöqtəyə çevirir”, - deyə Sorçinelli əlavə edib.
Sorçinelli kilsə geyimləri dizaynına yolunun uşaqlıqdan başladığını da deyib. O, uşaq vaxtı anasına yerli kilsənin təmizlənməsində kömək etdiyini xatırladıb.
“Hər qayğı hərəkəti, memarlığa, orqana və ya mehraba hər baxış məndə inamın ən xırda detallarda belə yaşadığı hissini oyadırdı”, - deyə dizayner qeyd edib.
Ənənəvi dini institutla işləməsinə baxmayaraq, Sorçinelli açıq gey olduğunu gizlətmir. O bildirib ki, bunu heç vaxt ziddiyyət kimi görməyib.
“Mən heç vaxt inamla seksuallıq arasında ziddiyyət görməmişəm. Mənim üçün bu, işimi qidalandıran yaradıcı gərginlikdir”, - deyə o bildirib.
Dizaynerin sözlərinə görə, onun kilsə daxilindəki təcrübəsi qəbul olunmaq təcrübəsi olub:
“Məni heç vaxt məbədin astanasında saxlamayıblar”.
Sorçinelli vurğulayıb ki, onun işi siyasi xarakter daşımır:
“Bu, etiraz deyil, ənənəyə sədaqətdir. Doktrina istiqamət verir, kənarlaşdırmır”.
Bizim.Media
