Lənkəranda avtomobil təmiri sexində xoşagəlməz hadisə baş verib.
Bizim.Media xəbər verir ki, insident şəhərin Füzuli küçəsində, “Kürə” kimi tanınan ərazidə qeydə alınıb.
Məlumata görə, 1991-ci il təvəllüdlü Lənkəran sakini İlham Şahvəli oğlu Qasımlı işlədiyi emalatxanada benzinlə ehtiyatsız davrandığı zaman alovlanma baş verib. Nəticədə partlayış olub və usta müxtəlif dərəcəli yanıq xəsarətləri alıb.
Zərərçəkən dərhal Lənkəran Rayon Mərkəzi Xəstəxanasına çatdırılıb. Müayinə zamanı ona bədənin bir neçə nahiyəsində yanıq, üz və hər iki qolda ikinci dərəcəli termiki zədələnmə diaqnozu qoyulub.
Ona ilkin tibbi yardım göstərildikdən sonra vəziyyəti nəzərə alınaraq reanimasiya şöbəsinə yerləşdirilib.
Hazırda vəziyyətinin orta-ağır olduğu bildirilir.
Hadisənin səbəbləri ilə bağlı araşdırma aparılır.
Sabutay, Bizim.Media, Cənub bürosu






























































































