Rusiyada zirehli jiletlər üçün xammal istehsal edən zavoda zərbə endirildi – VİDEO

Rusiyanın Başqırdıstan Respublikasının Sterlitamak şəhərində yerləşən Başqırdıstan Soda Şirkəti dron hücumuna məruz qalıb.

Bizim.Media xəbər verir ki, bu barədə “UNİAN” “Astra” nəşrinə istinadən məlumat yayıb. Hadisədən sonra zavodun yerləşdiyi ərazidən tüstünün qalxdığı bildirilib.

Bölgədə dron təhlükəsi elan edilib, Ufa hava limanında təyyarələrin uçuş və enişinə məhdudiyyətlər tətbiq olunub.

Nəşrin məlumatına görə, Rusiyanın ən böyük kimya komplekslərindən biri olan müəssisə kalsinasiya və qida sodasının istehsalına görə ölkədə ilk yerdədir. Şirkət həmçinin müdafiə sənayesi üçün məhsullar tədarük edir və Rusiyada tereftaloilxlorid istehsal edən yeganə müəssisədir. Bu kimyəvi birləşmədən zirehli jiletlər, dəbilqələr və hərbi texnika üçün zireh mühafizəsi elementlərinin hazırlanmasında istifadə olunan materiallar istehsal edilir.


Bizim.Media