Ukrayna Prezidenti Volodimir Zelenski ABŞ lideri Donald Trampın onu Rusiya Prezidenti Vladimir Putinlə müqayisə edən bəyanatlarına qəti şəkildə etiraz edib.
Bizim.Media xəbər verir ki, Politico nəşrinin məlumatına görə, son həftələrdə Ağ Ev rəhbəri ilə münasibətləri xeyli gərginləşən Zelenski Putinin terrorçu və işğalçı olduğunu vurğulayıb:
"Məni Putinlə müqayisə etmək olmaz. O – aqressordur, ölkəmizi işğal edib. O, böyükləri, uşaqları və öz əsgərlərini öldürüb. O – terrorçudur. Məhz buna görə də ümid edirəm ki, Prezident Tramp bu məsələdə öz mövqeyini açıq şəkildə bildirəcək", — deyə Ukrayna lideri bəyan edib.
Nəşr xatırladır ki, Donald Tramp bundan əvvəl Ukraynaya yeni rəhbərlik seçməyə çağırıb və Zelenski ilə işləməyin Putinlə işləməkdən daha çətin olduğunu bildirib.
Öz növbəsində, Zelenski Qərb liderləri ilə açıq danışmağın vacibliyini qeyd edərək əlavə edib:
"Hər hansı liderin sözləri və ya qərarları Ukraynaya qarşı yönəlibsə, Rusiyanı və birbaşa Putini dəstəkləyirsə, mən bunu qəbul edə bilmərəm. Məhz buna görə də çox dürüst və açıq şəkildə deyirəm ki, o qatildir. Bəlkə də bu, o qədər də nəzakətli deyil və bəlkə də Birləşmiş Ştatların prezidentinin məndən gözlədiyi bu deyil. Lakin təbəssümlə belə qatil olanlarla dostluq etməkdənsə, çox açıq və dürüst tərəfdaşlara sahib olmaq daha yaxşıdır".
Xatırladaq ki, Zelenski daha əvvəl Rusiyanın 60 günlük atəşkəsə riayət edəcəyi təqdirdə Ukraynada seçkilərin keçirilməsinə hazır olduğunu bildirmişdi.
Bizim.Media
