Hindistanda həkimlər 16 yaşlı yeniyetmənin sol göz yuvasından cərrahi əməliyyatla tam formalaşmış köpək dişi çıxarıblar.
Bizim.Media xəbər verir ki, bu nadir tibbi hadisə ilə bağlı məlumatı “The Independent” qəzeti yayıb.
Məlumata görə, yeniyetmə göz qapağı ilə qaşı arasındakı nahiyədə təxminən bir ay ərzində ağrısız şişkinlik müşahidə edib. Dərinin altından iki sərt və ağ çıxıntının görünməyə başlamasından sonra xəstəxanaya müraciət edib. Aparılan müayinələr nəticəsində şişkinliyin ağız boşluğundan kənarda inkişaf etmiş, tam formalaşmış diş olduğu müəyyənləşib.
Tibbdə “ektopik diş” adlandırılan bu hal diş toxumasının adi inkişaf yolundan kənarda, bədənin qeyri-adi bir nahiyəsində formalaşması və ya çıxması deməkdir. Belə dişlər süd dişləri, daimi dişlər və ya artıq diş toxumaları ola bilər.
İnsan üzünün ana bətnində inkişafı zamanı müxtəlif hüceyrə qrupları və toxumalar qarşılıqlı əlaqəyə girərək formalaşır. İnkişaf mərhələsində baş verən pozuntular diş toxumasının ağız boşluğundan uzaq bir yerdə yaranmasına səbəb ola bilər.
Bununla yanaşı, fiziki travmalar, əvvəlki diş müalicələri, kistalar və şişlər də ektopik dişlərin yaranmasına təsir göstərə bilən amillər sırasındadır. Lakin Hindistanda göz yuvasından diş çıxarılan yeniyetmənin tibbi tarixçəsində hər hansı travma qeydə alınmayıb.
Həkimlər dişin məhz həmin nahiyədə inkişaf etməsinin dəqiq səbəbini müəyyənləşdirə bilməyiblər.
Bizim.Media
