Finlandiyanın telekommunikasiya avadanlıqları istehsalçısı "Nokia" 2026-cı ilin sonuna qədər Çindəki bütün zavodlarını bağlamağı planlaşdırır.
Bizim.Media xəbər verir ki, bu barədə "South China Morning Post" (SCMP) qəzeti öz mənbələrinə istinadən yazır.
Qeyd olunur ki, 2025-ci ilin sonuna olan məlumata görə, "Nokia"nın Çin, Honkonq və Tayvandakı işçi heyəti təxminən 7,2 min nəfər təşkil edib. Şirkət 2026-cı ilin sonuna qədər onların böyük qismini işdən çıxarmağı planlaşdırır.
Mənbələrdən birinin sözlərinə görə, "Nokia"nın biznesi son illərdə tənəzzül yaşayır, bu səbəbdən şirkət ölkədəki fəaliyyətinə düzəlişlər etmək qərarına gəlib.
İyulun 22-də "GSMArena" nəşri xəbər vermişdi ki, "HMD" şirkəti brendin su və tozdan qorunma xüsusiyyətinə malik ən ucuz modeli kimi təqdim olunan düyməli "Nokia 123 Shield" telefonunu nümayiş etdirib. Avropada yeni məhsul artıq təxminən 35 avroya satışa çıxarılıb.
İstehsalçının bildirdiyinə görə, "Nokia 123 Shield" modeli IP65 standartının tələblərinə cavab verir ki, bunun da sayəsində yağışdan, su sıçrayışlarından, qumdan və tozdan qorunur. Telefon həmçinin sürüşməyən yan tərəflərə, qulaqlıq və şarj girişlərini qoruyan rezin kipləşdiricilərə malikdir.
Bizim.Media
