Texnologiyanın sürətli inkişafı, xüsusilə süni intellekt və avtomatlaşdırma sistemlərinin geniş yayılması əmək bazarında ciddi dəyişikliklərə səbəb olur.
Mütəxəssislər bir sıra peşələrin yaxın illərdə ya tamamilə sıradan çıxacağını, ya da ciddi şəkildə transformasiya olunacağını bildirirlər.
Analitiklərin qənaətinə görə, ən böyük risk altında olan sahələr əsasən rutin və təkrarlanan tapşırıqlardan ibarət işlərdir.
Bizim.Media xəbər verir ki, bunlara kassirlik, məlumatların daxil edilməsi üzrə operatorlar, bəzi inzibati və kargüzarlıq vəzifələri, həmçinin sadə müştəri xidmətləri daxildir.
Avtomatlaşdırılmış sistemlər bu funksiyaları daha sürətli və ucuz yerinə yetirdiyi üçün insan əməyinə ehtiyac azalır.
Eyni zamanda istehsalat sektorunda da müəyyən peşələr risk altındadır. Xüsusilə konveyer xəttində işləyən işçilər və bəzi sadə texniki nəzarət vəzifələri robotlaşdırma səbəbilə azala bilər. Pərakəndə satışda isə özünəxidmət kassalarının artması bu sahədə iş yerlərini azaldan əsas amillərdən biri kimi göstərilir.
Bununla yanaşı, ekspertlər vurğulayırlar ki, bütün bu proses işsizliyin artması ilə yanaşı yeni peşələrin yaranmasına da yol açır.
Məlumat analitikləri, süni intellekt üzrə mütəxəssislər, kibertəhlükəsizlik üzrə ekspertlər və rəqəmsal transformasiya sahəsində çalışan kadrlar əmək bazarında daha çox tələb görməyə başlayır.
Mütəxəssislər hesab edirlər ki, əsas həlledici faktor insanların yeni texnologiyalara uyğunlaşma sürəti və təhsil sistemlərinin bu dəyişikliklərə nə qədər tez cavab verə bilməsidir.
Bizim.Media
