Mayın 18-də Bakının ev sahibliyi etdiyi Ümumdünya Şəhərsalma Forumunun 13-cü Sessiyası (WUF13) çərçivəsində təşkil olunan "Urban Expo" sərgisində Hindistan pavilyonu açılıb.
Bizim.Media xəbər verir ki, Hindistanın Mənzil və Şəhər İşləri Nazirliyi tərəfindən “Hindistanın şəhər transformasiyası: Milyardlarla arzunun mənzillə təmin edilməsi” şüarı ilə yaradılan pavilyon ölkənin şəhər inkişafı və transformasiya yolunu nümayiş etdirir.
O, milli, ştat və şəhər səviyyəsində həyata keçirilən təşəbbüslərin innovativ şəhər siyasətləri, proqramlar və tərəfdaşlıqlar vasitəsilə milyardlarla insanın arzularını necə reallığa çevirdiyini göstərir. Açılış mərasimində çıxış edən Hindistanın ölkəmizdəki səfiri Abhay Kumar ölkəsinin inklüziv, dayanıqlı və davamlı şəhərlər qurmaq istiqamətində öhdəliyini və səylərini vurğulayıb.
Hindistan pavilyonunun əsas məqsədi ölkənin gələcəyin şəhər strukturlarını formalaşdırmaq üçün müxtəlif maraqlı tərəfləri bir araya gətirən əlverişli ekosistemi necə yaratdığını göstərməkdir.
Bu yanaşma şəhər problemlərinin daha səmərəli planlaşdırılması və idarə olunmasına kömək edir, eyni zamanda, Hindistan şəhərlərinin coğrafi, sosial və iqtisadi baxımdan inklüziv şəkildə inkişafına şərait yaradır.
Bizim.Media
