Ermənistan Hərbi Prokurorluğunun Dövlət maraqlarının müdafiəsi şöbəsi Araqatsotn vilayəti, Aştarak yaşayış məntəqəsinin Kasax istirahət zonasında yerləşən “Vana liç draxt” restoran kompleksinin və ona bitişik 2,56 hektar ərazinin özgəninkiləşdirilməsi prosesinin qanuniliyini araşdırıb.
Bizim.Media xəbər verir ki, yoxlama zamanı məlum olub ki, Ermənistan Respublikasının müdafiə nazirinin (Serj Sarkisyan - red.) məruzəsi əsasında, əmlakın müəyyən edilmiş qaydada qiymətləndirilməsi aparılmadan, 18 mart 2004-cü il tarixli Ermənistan Respublikası hökumətinin qərarı ilə dövlət mülkiyyətində olan istirahət zonasının binaları və tikililərinin fiziki şəxsə birbaşa satış yolu ilə özgəninkiləşdirilməsinə icazə verilib və satış qiyməti 500 min ABŞ dolları müəyyən edilib.
Halbuki bu əmlak hələ 1997-ci ildə 500 min ABŞ dolları məbləğində qiymətləndirilmişdi, bundan sonra kompleks genişləndirilmiş, tikilmiş və abadlaşdırılmışdı.
Bundan əlavə, özgəninkiləşdirilmədən təxminən bir il sonra, 26 aprel 2005-ci il tarixli daşınmaz əmlakın ipoteka müqaviləsinə əsasən, həmin əmlakın ləğvetmə dəyəri 700 min ABŞ dolları müəyyən edilmişdi.
Yoxlama ilə həmçinin müəyyən edilib ki, hüquqi və müqavilə əsasları olmadan fiziki şəxsin adına 2,56 hektar ərazinin icarə hüququ qeydiyyata alınıb və bu, sonradan həmin şəxsin kadastr dəyəri 115 milyon 814 min 400 dram olan torpaq sahəsinə mülkiyyət hüququnu əvəzsiz əldə etməsinə əsas olub.
Prokuror törədilmiş cinayət əlamətlərini aşkarladıqdan sonra cinayət barədə məlumatı Korrupsiyaya Qarşı Mübarizə Komitəsinə göndərib və bunun əsasında cinayət təqibinə başlanılıb. Hərbi Prokurorluq dövlət maraqlarının müdafiəsi məqsədilə məhkəməyə iddia təqdim edib və iddia icraata qəbul olunub.
Xatırladaq ki, bundan öncə Serj Sarkisyana müxtəlif illərdə 6 cinayət işi açılıb.
1.“Dizel yanacağı işi” — 2013-cü ildə dövlət vəsaitindən 489,16 milyon dramın mənimsənilməsi ilə bağlı iş. Sarkisyan bu iş üzrə ittiham olunub, 2024-cü ildə bəraət alıb.
2. “Silva Ambartsumyan işi” — keçmiş prezidentin iş adamı Silva Ambartsumyandan təxminən 2,985 milyon dollar rüşvət almaqda ittiham edildiyi iş.
3.“İsakov prospektinin torpaqları işi” — Müdafiə Nazirliyinin balansında olan təxminən 11 hektar torpaq sahəsinin 2005-2006-cı illərdə bazar qiymətindən xeyli aşağı qiymətə özgəninkiləşdirilməsi ilə bağlı iş.
4.“Mixail Baqdasarov işi” — 1998-2010-cu illərdə iş adamı Mixail Baqdasarovdan külli miqdarda rüşvət alma ittihamı ilə bağlı cinayət işi.
5.“Qara qala” işi — Gümrüdəki tarixi-mədəni abidə olan “Qara qala”nın qanunsuz özgəninkiləşdirilməsi ilə bağlı iş. Bu iş üzrə 2026-cı ildə istintaq başa çatıb.
6.“Kondun torpaqları” işi — Robert Köçəryanın prezidentliyi dövründə dövlət əmlakı və torpaqlarının özgəninkiləşdirilməsi ilə bağlı 2026-cı ildə yenidən gündəmə gələn geniş cinayət işi. Bu iş üzrə Sarkisyana da vəzifə səlahiyyətlərindən sui-istifadə maddəsi ilə ittiham irəli sürülüb.
Bizim.Media
