Moderator.az şair-publisist Heydər Oğuzun daha bir məhəbbət şeirini oxuculara ərməğan edir:
Haqqım yox sənə olan
Sevgim ilə öyünəm,
Sənsizlik həsrətindən
Gileylənəm, deyinəm.
Mən sənin heç nəyinəm!
Artıq yadam o könlə,
Nə duy məni, nə dinlə!
Nə olsun, həsrətinlə
Qəlbi düyün-düyünəm?
Mən sənin heç nəyinəm!
Sən Leyli ad-sanında
Kiməm sənin yanında?
Məcnun kimi canında
Ürəyəm ki, döyünəm?
Mən sənin heç nəyinəm!
Köhnəlmiş oyuncağam,
Yaraşmıram qucağa.
Nə sən həminki çağa,
Nə mən o ərköyünəm.
Mən sənin heç nəyinəm!
Sənə nə ya gülürəm,
Ya qüssədən ölürəm?
Bunu çoxdan bilirəm-
Sanma ki, kütbeyinəm,
Mən sənin heç nəyinəm!
