Arıqlamaq üçün ən faydalı iki bitki: Düyü və qarabaşağın fərqi nədir?

Düyü və qarabaşaq yarması demək olar ki, hər mətbəxdə istifadə olunan əsas ərzaq məhsullarındandır.

Bizim.Media xəbər verir ki, hər iki məhsul münasib qiymətə satılır və müxtəlif yeməklərin hazırlanmasında istifadə edilir. Lakin onların orqanizmə təsiri fərqlidir. Buna görə də seçim edərkən məqsəddən asılı olaraq uzunmüddətli toxluq hissi, həzmin asanlığı və kalorililik kimi amillər nəzərə alınmalıdır.

Qarabaşaq yarması, yoxsa düyü – hansı daha faydalıdır?

Kalorililik baxımından bu iki məhsul arasında ciddi fərq yoxdur. Çiy halda 100 qram qarabaşaq yarmasında təxminən 340 kilokalori, düyüdə isə 350 kilokalori var. Suda bişirildikdə bu göstəricilər müvafiq olaraq təxminən 110 və 130 kilokaloriyə enir. Lakin qida dəyəri baxımından fərqlər daha nəzərəçarpandır.

Qarabaşaq yarmasının faydaları

Qarabaşaq yarması zülal, qida lifi, dəmir və maqnezium baxımından daha zəngindir. Bundan əlavə, onun tərkibində damar sağlamlığını dəstəklədiyi bildirilən rutin adlı antioksidant da mövcuddur. Bu barədə “EXCLI” jurnalında dərc olunmuş araşdırmada qeyd olunur.

Qarabaşaq yarmasının qlisemik indeksi də aşağıdır və təxminən 54 təşkil edir. Buna görə də o, qanda şəkərin səviyyəsini daha yavaş artırır və daha uzun müddət toxluq hissi yaradır.

Düyünün faydaları

Ağ düyü daha az qida lifi və mikroelement ehtiva etsə də, daha asan həzm olunur və nadir hallarda allergik reaksiyaya səbəb olur. Bu səbəbdən o, uşaqlar üçün ilk əlavə qida kimi, həmçinin qastrit, qıcıqlanmış bağırsaq sindromu olan və xəstəlikdən sağalma dövrünü yaşayan insanlar üçün tez-tez tövsiyə edilir.

ABŞ Milli Tibb Kitabxanasının araşdırmalarına əsasən, qəhvəyi düyü qida dəyəri baxımından ağ düyüdən daha üstündür. Çünki onun tərkibində daha çox vitamin və mineral qorunub saxlanılır.

Arıqlamaq üçün hansı daha uyğundur?

Zülal tərkibinə görə də qarabaşaq yarması üstünlük təşkil edir. Onun 100 qramında təxminən 13 qram zülal olduğu halda, düyüdə bu göstərici 7 qramdır. Bundan əlavə, qarabaşaq yarması bütün əvəzolunmaz amin turşularını ehtiva edir ki, bu da xüsusilə vegetarianlar və idman qidalanmasına riayət edən şəxslər üçün əhəmiyyətlidir.

Yüksək qida lifi tərkibi qarabaşaq yarmasını həzm sisteminin fəaliyyətinin dəstəklənməsi, qəbizliyin qarşısının alınması və iştahanın idarə olunması baxımından da faydalı edir.

JNM jurnalında dərc olunmuş araşdırmaya əsasən isə düyü həssas həzm sistemi və mədə-bağırsaq xəstəlikləri olan insanlar üçün daha münasib seçim hesab olunur.

Mütəxəssislərin fikrincə, qarabaşaq yarması aşağıdakı hallarda daha məqsədəuyğundur:

- arıqlamaq və qanda şəkərin səviyyəsinə nəzarət etmək istəyənlər üçün;

- şəkərli diabetdən əziyyət çəkən şəxslər üçün;

- hamiləlik dövründə.

Sonuncu üstünlük onun tərkibində dəmir, maqnezium və folatın daha çox olması ilə izah edilir. Bununla yanaşı, hamiləlik toksikozu zamanı adi qaynadılmış düyü daha rahat qəbul olunur.

Düyü isə aşağıdakı hallarda daha uyğun seçim hesab edilir:

- məşqdən sonra enerji ehtiyatını qısa müddətdə bərpa etmək lazım gəldikdə;

- bir yaşınadək uşaqlar üçün;

- qastrit, qıcıqlanmış bağırsaq sindromu və digər həzm sistemi xəstəlikləri zamanı.

Beləliklə, əsas məqsəd arıqlamaqdırsa, yüksək zülal və qida lifi tərkibi, zəngin vitamin-mineral tərkibi, eləcə də aşağı qlisemik indeksi sayəsində qarabaşaq yarması daha üstün seçim hesab olunur. Düyü isə həssas həzm sistemi olan şəxslər və xəstəlikdən sağalma dövründə olan insanlar üçün daha uyğun məhsul sayılır. (Demokrat.az)

Bizim.Media