“Generalların sayı azaldılmalıdır”

 “Azərbaycanda generalların sayının azaldılmasına ehtiyac var”. Bu sözləri Moderator.az saytına “Hərbi Jurnalistlər” İctimai Birliyinin sədri, polkovnik Üzeyir Cəfərov söyləyib. Onun sözlərinə görə, belə bir addım dövlət büdcəsinə qənaət baxımından da əhəmiyyətli addımdır: “Birincisi, torpaqların işğal altında olduğu indiki dövrdə generalların sayının bu qədər artırılması doğru deyil. Çünki işğaldakı torpaqlarımız hələ azad edilməyib və düşmən bu torpaqları əlində saxlayır. İkincisi, generalların sayının artırılması onlara əmək haqqı qismində dövlət büdcəsindən əhəmiyyətli miqdarda vəsaitin ayrılmasına səbəb olur ki, bu vəsaiti həmin generallar təqaüdə çıxdıqdan sonra da alırlar. Buna görə də, generalların sayının azaldılması dövlət büdcəsindəki pullara da qənaət etməyə imkan verər. Hesab edirəm ki, bu və bu kimi amillər nəzərə alınaraq generalların sayının azaldılması istiqamətində konkret addımlar atılmalıdır”.