Hindistanda 47 yaşlı Ramabay Ranvir qızının təhsil xərclərini qarşılamaq üçün ilk dəfə qaçış yarışına qatılıb və 3 kilometrlik məsafəni ayaqyalın başa vuraraq qalib gəlib.
Bizim.Media xəbər verir ki, Maharaştra ştatının qərbində yerləşən Bid rayonunun Ambacoqay şəhərində yaşayan tək ana avqust ayında keçirilən “Amrit Daud” yarışında iştirak edib.
Heç vaxt qaçış üzrə məşq keçməyən və xüsusi idman ayaqqabısı olmayan Ramabay 30-60 yaş kateqoriyasında birinci olub. O, qalib kimi 3 min rupi, yəni təxminən 31 ABŞ dolları qazanıb. Ramabay yarışdan sonra “BBC News Marathi”yə verdiyi müsahibədə bildirib ki, bu məbləği qızının təhsili üçün lazım olan kitab və dəftərxana ləvazimatlarına xərcləmək istəyib.
Ramabay müsahibəsində yarışa necə qatıldığını ətraflı danışıb. Onun sözlərinə görə, 22 yaşlı böyük qızı Puca bir gün səhər yanına gələrək qaçış yarışında iştirak etmək istədiyini deyib.
“Qızım səhər tezdən yanıma gəldi və dedi: “Ana, qaçış yarışında iştirak etmək istəyirəm”, - Ramabay bildirib.
O, qızından yarışın harada keçiriləcəyini soruşduğunu, Pucanın isə tədbirin yaxınlıqda olduğunu söylədiyini deyib. Ramabayın sözlərinə görə, qızı qalib gələcəyi təqdirdə mükafat pulunun təhsilinə kömək edəcəyini bildirib. Lakin daha sonra kiçik qızı ilə bağlı problem yaranıb.
“Kiçik qızım Nandeddə yaşayır. Ona kitab almaq üçün pul verə bilmədim və buna görə də səkkiz gün ərzində telefonla mənimlə danışmadı. Buna görə qaçıb yarışı qazanmalı olduğuma qərar verdim”, - Ramabay deyib.
“Mənim yeganə istəyim mükafatı qazanmaq idi”, - o əlavə edib.
Ramabay yarışa sari və sandaletlərlə başlayıb. Lakin qaçış zamanı yağış səbəbindən ayaqqabıları sürüşməyə başlayıb. O, sandaletlərini çıxararaq bir əlində tutub və qaçışı ayaqyalın davam etdirib.
Yolun yaş və daşlı olduğunu deyən Ramabay ayaqlarının iti daşlardan zədələndiyini, lakin buna baxmayaraq dayanmadığını bildirib.
“Bir qədər qaçdıqdan sonra yağışa görə sandaletlərim ayağımdan çıxmağa başladı. Onları çıxarıb bir əlimdə tutdum və ayaqyalın qaçmağa davam etdim. Yol yaş idi, xırda daşlar və iti çınqıllar ayaqlarımı ağrıdırdı”, - o danışıb.
Ramabay bildirib ki, ailəsi üçün hər gün çalışdığına görə qaçış zamanı da bir qədər daha davam etməyə qərar verib.
“Düşündüm ki, ailəm üçün hər gün qaçıram, həmin gün də bir az daha qaçacağam”, - deyə o qeyd edib.
Ramabay müsahibəsində yarışda iştirakının məqsədinin özünü sübut etmək olmadığını xüsusi vurğulayıb: “Mən yarışı qazana biləcəyimi sübut etmək üçün qaçmadım. Qızımın təhsili üçün pula ehtiyacım olduğu üçün qaçdım”.
O, sonradan aldığı yardımları da qızlarının təhsilinə yönəltmək niyyətində olduğunu deyib.
Ramabay hazırda Ambacoqay şəhərində bir neçə evdə aşpaz və köməkçi kimi çalışır və ayda təxminən 9 min rupi qazanır. O, həyat yoldaşının 2012-ci ildə vəfat etməsindən sonra iki qızının bütün məsuliyyətini təkbaşına daşıyır.
Ramabay böyük qızı Pucanın polis olmaq üçün hazırlaşdığını, kiçik qızı Aratinin isə informasiya texnologiyaları üzrə təhsil aldığını və dövlət qulluğu imtahanına hazırlaşdığını bildirib.
Ramabay özü 13 yaşında məktəbi yarımçıq qoyub.
İllər ərzində kənd təsərrüfatı sahəsində çalışıb, soya, noxud və sarıkök yığıb, ailəsini dolandırmaq üçün müxtəlif işlər görüb. Daha sonra qızının təhsil aldığı hazırlıq kursunda aşpaz kimi işləməyə başlayıb. Onun ən böyük arzusu qızlarının yaxşı təhsil alması və özünün yaşadığı çətinlikləri onların yaşamamasıdır.
“Mən sadəcə istəyirəm ki, onlar xoşbəxt həyat yaşasınlar. Mənim çəkdiyim çətinlikləri onların da yaşamasını istəmirəm. Onların palçıq içində addımlamasını, günəşin istisində və ya yağış altında getməsini istəmirəm. Çəkdiyim bütün əziyyətləri onların yaşamasını istəmirəm”, - Ramabay bildirib.
Ramabayın ayaqyalın yarışması yalnız onun şəxsi mübarizəsi kimi deyil, Hindistanın kənd yerlərində təhsilə çıxış imkanları ilə bağlı problemlərin göstəricisi kimi də müzakirə olunub.
Şoma Sarkar Ramabayın hekayəsi ilə bağlı “Bu, cəmiyyət olaraq bizim qələbəmizdir, yoxsa ayıbımız?” sualını səsləndirib.
Ramabayın hekayəsi yayıldıqdan sonra ona ölkənin müxtəlif yerlərindən dəstək gəlməyə başlayıb. Bid rayon administrasiyası ona 50 min rupi maliyyə yardımı ayırıb, müxtəlif şəxslər isə ailəyə pul, geyim, ayaqqabı və təhsil ləvazimatları göndərib.
Hindistan Ali Məhkəməsinin sədri Surya Kant da Ramabay üçün 50 min rupi maliyyə yardımı ayrılması barədə göstəriş verib.
Universitet Qrantlar Komissiyasının rəhbəri Suxadeo Torat isə onun hekayəsinin təhsil sahəsindəki sistemli problemlərə diqqət çəkdiyini bildirib.
Ramabay isə bütün bunların fonunda qızlarının gələcəyinə ümidini qoruyur. Onun arzusu övladlarının yaxşı həyat yaşaması və özünün keçdiyi ağır yoldan keçməməsidir. (Qafqazinfo.az)
Bizim.Media
