Fazil Mustafa: “İmkan yaradılsa, Ermənistandakı abidələrin də bərpasına hazırıq”

“Azərbaycan Qərbi Azərbaycanla bağlı hansısa imkan yaradılsa, indiki Ermənistan ərazisində abidələrin bərpası üçün nə lazımdırsa, təşəbbüsə hazırdır. Sülh sazişi imzalandıqdan sonra biz oradakı abidələrin də bərpasına töhfəmizi verəcəyik”.

Bizim.Media xəbər verir ki, bunu deputat Fazil Mustafa Mədəniyyət Nazirliyi və Dini Qurumlarla İş üzrə Dövlət Komitəsinin birgə təşkilatçılığı ilə keçirilən “Tarixi-dini abidələrin qorunması: çağırışlar və perspektivlər” mövzusunda konfrans çərçivəsində çıxışı zamanı bildirib.

Onun sözlərinə görə, tarixi abidələrin yalnız daşlarının və ya əvvəlki modelinin yox, tarixi yaddaşın da bərpası və ona yeni turistik mahiyyət verilməsi vacibdir.

"Bu abidələri bərpa etməklə təkcə bizim cəmiyyətə hörmət ifadə etmirik, həm də başqalarının turistik məkan kimi yanaşmasını təmin etmiş oluruq. 

Biz bütün tarixi abidələri bərpa edirik. Kilsəni də, məscidi də, sinaqoqu da eyni multikulturalist, humanist yanaşma ilə edirik. Bizdə tarixi-dini abidələrə etnik prizmasdan yanaşılmır. Biz Avropada da, Fransada da, Vatikanda da tarixi-dini abidələrin bərpasına töhfələrimizi veririk".

Fəridə, Bizim.Media