Odessa kütləvi şəkildə atəşə tutuldu: Çoxmərtəbəli binaya zərbələr dəydi – FOTO -VİDEO

Sentyabrın 17-nə keçən gecə Rusiya qüvvələri Odessa vilayətinə qarşı kütləvi hücum həyata keçirib. Hücum nəticəsində vilayət mərkəzində çoxmərtəbəli yaşayış binası və fərdi yaşayış sektoru hədəfə alınıb.

Bizim.Media xəbər verir ki, Odessanın Hərbi Administrasiyasının rəhbəri Sergey Lısakın məlumatına görə, düşmən hücumu nəticəsində 19 mərtəbəli yaşayış binasına zərbə dəyib, 14-cü mərtəbədən 16-cı mərtəbəyə qədər mənzillər dağılıb.

Ümumilikdə hücum nəticəsində 7 nəfər, o cümlədən 4 və 13 yaşlı iki uşaq xəsarət alıb.

Fövqəladə Hallar Dövlət Xidmətinin məlumatına görə, çoxmərtəbəli binada baş verən yanğın söndürülüb, şəhərdə bir fərdi yaşayış evi tamamilə məhv edilib. Digər ünvanlarda isə anbar binaları, uşaq bağçası, avtomobillər və qarajlar zərər görüb. Hadisə yerində 150-dən çox xilasedici işləyir.

Xatırladaq ki, sentyabrın 13-də Rusiya ordusu Odessanı idarə olunan aviasiya bombaları və "Şahed" dronları ilə atəşə tutmuş, nəticəsində 24 nəfər yaralanmışdı.

Bundan əvvəl, sentyabrın 12-də isə Arkadiya rayonundakı 25 mərtəbəli "Perlina" yaşayış kompleksinə edilən zərbə nəticəsində 2 nəfər həlak olmuş, otuzadək insan yaralanmışdı.





Bizim.Media