Ermənistanda sabiq müdafiə naziri Seyran Ohanyan barəsindəki cinayət işi üzrə ibtidai istintaq başa çatıb.
Bizim.Media xəbər verir ki, nəzarətçi prokurorun qətnaməsi ilə keçmiş müdafiə idarəsinin rəhbəri haqqında vəzifə səlahiyyətlərindən sui-istifadə faktı üzrə ictimai cinayət təqibi başlanıb.
Ermənistan İstintaq Komitəsinin Baş Hərbi İstintaq İdarəsindən verilən məlumata görə, istintaq sabiq nazirliyin rəhbərliyinin hərbçilərin mənzillərlə təmin edilməsi prosesinə qanunsuz müdaxilə etməsi faktlarını aşkar edib.
Belə ki, 2008-ci ilin iyulunda Müdafiə Nazirliyinin daxili təhlükəsizlik şöbəsinin rəisi İrəvanda ona növbədənkənar mənzil verilməsi üçün raport verib. Həmin vaxt mənzillərin bölgüsü Mərkəzi Mənzil Komissiyasının səlahiyyətində idi və müdafiə nazirinin bu prosesə müdaxilə etmək səlahiyyəti yox idi.
Ərizəçi ilə qohumluq əlaqəsində olan Seyran Ohanyan mənzil komissiyasına ona növbədənkənar daşınmaz əmlak ayrılması ilə bağlı birbaşa tapşırıq verib.
Nəticədə komissiya üzvləri həmin şəxsi uçota alaraq paytaxtda üçotaqlı mənzilin ayrılmasına səs veriblər. Bu hərəkətlər illərlə növbədə duran və mənzil şəraitinin yaxşılaşdırılmasına həqiqətən ehtiyacı olan hərbçilərin qanuni hüquqlarını kobud şəkildə pozub.
Hazırda ittiham aktı ilə birlikdə cinayət icraatı təsdiq edilməsi və mahiyyəti üzrə baxılması üçün məhkəməyə göndərilməsi məqsədilə nəzarətçi prokurora göndərilib.
Bizim.Media
