Xəbər verdiyimiz kimi, bir neçə gün əvvəl Türkiyənin İstanbul şəhərində bir qadın qızına xəsarət yetirən kürəkənini qətlə yetirib.
Bizim.Media xəbər verir ki, bu gün hadisəni törədə Delal A.-nın məhkəmə iclası keçirilib.
Qərara əsasən, o, məhkəmənin nəzarəti altında sərbəst buraxılıb. Məhəlləsinə qayıdan qayınana qonşuları tərəfindən alqışlarla qarşılanıb və o bu mənzərə qarşısında göz yaşlarını saxlaya bilməyib.
Delal A.-nın "Əgər mən bunu etməsəydim, o, hamımızı öldürərdi" sözləri diqqət çəkib.
Xatırladaq ki, qətl hadisəsi Çeliktepe məhəlləsində baş verib. İddiaya görə, barəsində uzaqlaşdırma qərarı olduğu bildirilən Rüzgar Eser boşanma mərhələsində olduğu həyat yoldaşı Nurşin E.-nin yaşadığı evə gəlib. Tərəflər arasında yaranan mübahisə qısa müddətdə şiddətlənib.
Məlumata görə, Rüzgar Eser yanında olan qeydiyyatsız silahla həyat yoldaşına atəş açıb. Nəticədə qadın boyun, yanaq və çənə nahiyəsindən ağır yaralanıb.
Bundan sonra Eserin evdə olan baldızı və qayınanasına da zorakılıq göstərdiyi bildirilib. Mübahisənin böyüməsi zamanı qayınana mətbəxdən götürdüyü bıçaqla ona sinə nahiyəsindən xəsarət yetirib.
Hadisə yerinə çağırılan təcili tibbi yardım əməkdaşları Rüzgar Eserin həyatını itirdiyini müəyyən ediblər. Ağır yaralanan Nurşin E. isə ilkin tibbi yardımdan sonra xəstəxanaya çatdırılıb.
Polisin hadisə yerində apardığı araşdırma zamanı hücumda istifadə edildiyi ehtimal olunan qeydiyyatsız tapança aşkar edilib.
Araşdırmalar nəticəsində daha əvvəl Rüzgar Eserin “təhdid”, “təhqir” və “əmlaka zərər vurma”, Nurşin E.-nin isə “təhdid” və “təhqir” maddələri üzrə istintaqa cəlb olunduğu müəyyən edilib.
Cütlüyün 4 yaşlı qız övladı var.
Bizim.Media
