İsrail şiə qruplaşması "Hizbullah" tərəfindən pilotsuz uçuş aparatlarının (PUA) buraxılmasına cavab olaraq Livandakı Ərəb Səlim bölgəsinə hücum edib.
Bizim.Media xəbər verir ki, bu barədə "Lebanon 24" xəbər portalı məlumat yayıb.
Məlumatda bildirilir ki, İsrail ordusu, “Hizbullah”ın atəşkəs rejimini pozmasına cavab olaraq, ölkənin cənubundakı bir neçə şəhərə silsilə reydlər həyata keçirib.
Ərəb Səlim şəhərinə endirilən iki hava zərbəsi nəticəsində bir qadın yaralanıb. Bundan əlavə, Kfar-Rumman şəhərinə də hava zərbəsi endirilib.
Qeyd edək ki, avqustun 27-də "Hizbullah" İsrailin hava məkanına iki pilotsuz uçuş aparatı buraxıb. İsrail ordusu əsgərlərinin PUA-lardan birini vurduğunu, ikincisi ilə isə əlaqənin itdiyini bəyan edib. Hadisə nəticəsində xəsarət alan olmayıb.
Bizim.Media
