İsti duşdan və ya vannadan sonra dəridə güclü qaşınmanın yaranması bəzi hallarda qan xəstəliklərinin, o cümlədən polisitemiya vera adlı nadir qan xərçənginin əlamətlərindən biri ola bilər.
Bizim.Media xarici KİV-ə istinadən xəbər verir ki, “Mayo Clinic” mütəxəssisləri polisitemiya veranın sümük iliyinin həddindən artıq eritrosit istehsal etməsinə səbəb olduğunu bildirirlər.
Nəticədə qan qatılaşır və onun damarlarla hərəkəti yavaşıyır. Bu isə qan laxtalarının yaranması kimi ciddi fəsadların riskini artıra bilər.
Bu xəstəliyin diqqət çəkən əlamətlərindən biri, xüsusilə isti duş və ya vannadan sonra güclənən dəri qaşınmasıdır. “Mayo Clinic” isti suyun belə qaşınmanı artıra biləcəyini qeyd edir və simptomu olan xəstələrə çox isti duş və vannalardan uzaq durmağı tövsiyə edir.
Başqa hansı əlamətlər ola bilər?
Polisitemiya vera uzun müddət heç bir simptom vermədən inkişaf edə bilər. Xəstəliyin mümkün əlamətləri arasında baş ağrısı, başgicəllənmə, yorğunluq, görmənin bulanması, nəfəs darlığı, əl və ayaqlarda keyimə və yanma hissi, dalağın böyüməsi, burun və diş əti qanaxmaları da göstərilir.
Bununla belə, duşdan sonra qaşınma avtomatik olaraq xərçəng demək deyil. Dərinin quruluğu, allergiya və digər dəri xəstəlikləri də qaşınmaya səbəb ola bilər. “Mayo Clinic” qaşınmanın iki həftədən çox davam etməsi, qəfil və səbəbsiz başlaması, bütün bədəni əhatə etməsi və ya arıqlama, hərarət və gecə tərləməsi kimi başqa simptomlarla müşayiət olunması halında həkimə müraciət etməyi məsləhət görür.
Belə hallarda səbəbi yalnız tibbi müayinə və qan analizləri ilə müəyyənləşdirmək mümkündür. (lent.az)
Bizim.Media
