Sərnişinlərdən 156 nömrəli avtobusla bağlı redaksiyamıza şikayət daxil olub. Onların sözlərinə görə, avtobus hərəkət zamanı qəfil dayanır və nasazlıq səbəbindən sərnişinlər yolda düşmək məcburiyyətində qalırlar.
Xüsusilə böyük tutumlu olan avtobusun çoxsaylı sərnişin daşıdığı nəzərə alınarsa, belə nasazlıqlar sərnişinlərin yolda qalmasına və növbəti avtobusu gözləməsinə səbəb olur. Bu da təkcə vaxt itkisinə deyil, eyni zamanda həmin avtobusda əlavə sıxlıq yaradır.
Eyni zamanda hərəkət zamanı qəfil dayanma ciddi yol-nəqliyyat hadisəsinə gətirib çıxara bilər. Sərnişinlərin sözlərinə görə, problem bu gün də daxil olmaqla dəfələrlə təkrarlanıb.
Bəs avtobusda nasazlıq varsa, niyə təmir edilmir və ya başqa avtobusla əvəzlənmir?
Məsələ ilə bağlı Azərbaycan Yerüstü Nəqliyyat Agentliyinin (AYNA) mətbuat katibi Tural Orucov Bizim.Media-nın sorğusuna cavab olaraq bildirib ki, sözügedən marşrut avtobusları yaxın vaxtda yenilənəcək:
“156 nömrəli marşrut xətti müsabiqəyə çıxarılaraq qalib müəyyən edilib və yaxın zamanda yeni daşıyıcı xəttin istismarını həyata keçirəcək”.
Xədicə Paşayeva, Bizim.Media
