AXCP-nin növbəti sessiyası keçirilir. Sessiyanın
gündəliyinə ictimai-siyasi vəziyyət, seçki ilində partiya qarşısında duran
vəzifələr və cari məsələlər daxildir.
İctimai-siyasi vəziyyət və qarşıda duran vəzifələrlə bağlı AXCP sədri
Əli Kərimli çıxış edib. O, Xalq Cəbhəsinin 24 illiyini qeyd etdiyini
xatırladaraq deyib:
"Postsovet məkanında Xalq
Cəbhəsi ilə birgə yaranan təşkilatların hamısı tarixə qovuşub. Amma bizim
missiyamız başa çatmadığı üçün, sizin fədakarlığınızla Xalq Cəbhəsi yaşayır,
mübarizəsini davam etdirir".
Əli
Kərimli Milli Şuranın yaranmasının əhəmiyyətinə toxunaraq bildirib: "Milli
Şuranı yaratmaqla hakimiyyəti çaş-baş salmışıq. Müxalifət birləşə bilmir kimi
ənənəvi təbliğatları alt-üst oldu. Digər tərəfdən Milli Şuranın vahid namizədlə
çıxış etməsi, dünyaca məşhur ziyalımız Rüstəm İbrahimbəyovun vahid
namizədliyinin irəli sürülməsi dünyanın diqqətini bizə artırıb".
Daha sonra AXCP sədri ABŞ Konqresinin Helsinki Komissiyasında
Azərbaycanla bağlı müzakirənin üzərində dayanıb.Əli Kərimli Milli Şuradakı
problemlərdən də danışıb. O, Şuranın strukturlarının hələ tam formalaşmadığını,
vahid namizəd seçilsə də, Müsavatın öz namizədini hələ saxlamasını və vahid
namizəd Rüstəm İbrahimbəyovun, heç bir siyasi qüvvəni təmsil etmədiyi üçün,
arxasında təşkilatlanmış siyasi gücün hiss olunmadığını qeyd etdi. O, bildirdi
ki, bu boşluğu AXCP doldurmalıdır, çünki “cəbhəçilər bu məsələyə səmimiyyətlə
yanaşır, kiməsə hesabat, müxalifətin birləşməsi ilə bağlı özünə təsəlli vermək
üçün yanaşmır”.
AXCP
sədri partiya qarşısında duran vəzifələrdən və görülməli işlərdən bəhs etdi. Bu
xüsusda o, siyasi fəallığın artırılmalı olduğunu xüsusi vurğuladı. Bildirdi ki,
bu gün Azərbaycandakı seçkilərlə bağlı daxili və xarici ovqatla partiyaların,
hətta ən yaxşı təşkilatlanmış AXCP-nin belə, mütəşəkkili arasında disproporsiya
var. Onun fikrincə, müxalifətin birləşməsinin cəmiyyətdə yaratdığı inama,
beynəlxalq rəyə uyğun siyasi fəallıq hiss olunmur.
