Özəl universitetlər Bakıdan köçürülə bilər – Yeni TƏKLİF GÜNDƏMDƏ

Yeni tədris ilinin başlanmasına sayılı günlər qalıb. Bununla da Bakıda nəqliyyat sıxlığı və tələbə axını yenidən gündəmə gəlib. Universitetlərin şəhərdən rayonlara köçürülməsi məsələsi isə hələ də aktual mövzulardan biri olaraq qalır.

Bəs belə bir addım tələbə və müəllimlər üçün nəyi dəyişdirəcək? Universitetlərin köçürülməsi şəhərdəki sıxlığın azalmasına real təsir göstərə bilərmi?

Təhsil eksperti Məzahir Məmmədli Bizim.Media-ya açıqlamasında bildirir ki, bu infrastruktur böyük xərc tələb edən və illər aparan bir prosesdir:

“Belə bir model artıq Azərbaycanda var. Məsələn, Azərbaycan Dövlət Pedaqoji Universitetin (ADPU) 7 regionda filialı açılıb. Bundan başqa, Azərbaycan Dövlət İqtisadiyyat Universitetinin (UNEC) Zaqatala filialı, Bakı Dövlət Universitetinin (BDU) Qazax filialı var. Orada imkanları bir qədər də artırmaq, maddi-texniki bazanı inkişaf etdirməklə yükü azaltmaq olar.

Başqa bir tərəfdən, məsələn, Lənkəran Dövlət Universiteti Bakı-Cənub bölgəsi üçün kifayət qədər geniş imkanlar açır. Yeni yataqxanalar tikilib, müasir standartlara uyğun laboratoriyalar qurulub və oradakı universitetin tədrisi heç də Bakıda yerləşən universitetlərdən geri qalmır. O cümlədən, artıq Mingəçevir Dövlət Universiteti üçün yeni korpuslar, kampuslar tikilir”.

Qarabağ Universiteti bu gün bizim üçün böyük bir təcrübədir

M.Məmmədli qeyd edir ki, Qarabağ Universitetində həm müəllimlərin həvəslə gedib işləməsi üçün geniş imkanlar açılıb, həm də tədrisin keyfiyyəti baxımından ciddi işlər görülüb. Məhz bu il üçün minimum keçid balının əvvəlcədən 350 baldan yuxarı olacağının müəyyənləşdirilməsi də bunu göstərir.

“Biz regionlarda yenidən qurulan universitetlərə bir qədər imkan yaratsaq, mərkəzdə yerləşən universitetləri köçürməkdən daha effektiv nəticə əldə edə bilərik. Çünki bu, böyük xərc və vaxt tələb edir.

Məsələn, Gəncədə yerləşən Azərbaycan Dövlət Aqrar Universitetinin yataqxana kompleksini nümunə göstərə bilərik. Orada çox geniş yataqxana imkanları var. Gəncə Dövlət Universitetinin və Azərbaycan Texnologiya Universitetinin də yerli imkanları geniş olmasa da, bölgədə yerləşən universitetlərin imkanlarını artırmaqla müəyyən qədər Bakıda olan yükü azalda bilərik”.

Özəl universitetlər birbaşa paytaxtda və mərkəzdə fəaliyyət göstərir,  yataqxanaları da yoxdur…

Ekspertin sözlərinə görə, bütün inkişaf etmiş, hətta bizim qonşu ölkələrdə belə, özəl universitetlər regionlarda daha çox fəaliyyət göstərirlər, bizdə isə vəziyyət tam əksinədir:

“Yaxşı olar ki, dövlət bunun üçün müəyyən investisiyalar və ya böyük kreditlər ayırsın ki, özəl universitet açmaq istəyənlər regionlarda ali məktəb yaratsınlar. Həmçinin özəl sektor üçün geniş rəqabət yaradan kampuslar, yataqxanalar tikilsin ki, bu, gələcəkdə tələbələrin diqqətini cəlb edə bilsin.

Azərbaycanda fəaliyyət göstərən universitetlərin təxminən 85-90 faizinin Bakı şəhərində yerləşməsi, əlbəttə ki, müəyyən mənada sıxlığa səbəb olur və bu, öz növbəsində, təhsilin keyfiyyətinə də müəyyən problemlər yaradır.

Müəllimlərin regionlara yerləşdirilməsində hər hansı bir problem olmayacaq

Qarabağ Universitetinin nümunəsində görürük ki, qurulan mühit, yaradılan atmosfer artıq universitetlərin aparıcı müəllimlərini, professor heyətini məhz ora cəlb edir. Çünki orada müəyyən motivasiyalar, həvəsləndirici amillər var. Bu, məhz mənzil şəraitinin təmin olunması və əməkhaqqının yüksək olmasıdır”.

M.Məmmədli hesab edir ki, regionlarda məqsədli inkişafın aparılmasına cəhdlər göstərilsə, bu halda müəllimlər də heç çəkinmədən şəhərdəki sıxlıqdan, gərginlikdən daha sağlam mühitə, təmiz havası və yaxşı şəraiti olan yerlərə getməkdə maraqlı olacaqlar.

Xədicə Paşayeva, Bizim.Media