Şəki Ağır Cinayətlər Məhkəməsində rəsmi sənədlər hazırlamada və dələduzluqda təqsirləndirilən Taryel Babayevin (adı, soyadı şərtidir) cinayət işi üzrə məhkəmə istintaqı başa çatıb.
Bizim.Media xəbər verir ki, hakim Tural Əfəndizadənin sədrliyi ilə keçirilən prosesdə hökm oxunub.
Məhkəmənin hökmü o, 5 il müddətə azadlıqdan məhrum edilib. Cinayət Məcəlləsinin 320.1-ci maddəsi ilə cinayət məsuliyyətinə cəlb etmə müddəti keçdiyinə görə təqsirləndirilən şəxsə cəza təyin olunmayıb.
İttihama görə, Taryel Babayev müxtəlif vaxtlarda aldatma və etibardan sui-istifadə etmə yolu ilə bir neçə şəxsə qarşı dələduzluq əməlləri törətməkdə ittiham olunur.
Belə ki, o, qayınatasına məxsus və rəhbərlik etdiyi MMC adından verilmiş etibarnamədən sui-istifadə edərək, tanışları ilə qabaqcadan əlbir olan bir qrup şəxs halında hərəkət edib. Təqsirləndirilən şəxs guya Füzuli və Ağdaş rayonlarında, habelə Bakı şəhərinin müxtəlif ərazilərində internet və infrastruktur layihələri üzrə subpodrat və tenderlərin təmin ediləcəyini vəd edərək zərərçəkmiş şəxsləri aldadıb.
İstintaqın mövqeyinə görə, bu məqsədlə zərərçəkmişlərdən müxtəlif vaxtlarda ümumilikdə yüz minlərlə manat pul vəsaiti alınıb. Pul vəsaitləri guya vəzifəli şəxslərə rüşvət verilməsi, tenderlərin müsbət həlli və layihələrin həvalə edilməsi adı altında ələ keçirilib.
Bundan əlavə, cinayətkar niyyəti həyata keçirmək üçün Taryel Babayev və onun əlbir olduğu şəxslər tərəfindən bir sıra rəsmi sənədlər – subpodrat müqavilələri və qiymət razılaşdırılması protokolları saxtalaşdırılıb. Saxta sənədlər zərərçəkmişlərə təqdim edilərək onlarda real layihə görüntüsü yaradılıb.
İstintaqla müəyyən edilib ki, təqdim edilən layihələrin faktiki olaraq mövcud olmadığı, müvafiq şirkətlərin həmin ərazilərdə heç bir iş icra etmədiyi halda, əldə edilən pul vəsaitlərinin təqsirləndirilən şəxs və onunla əlbir olan şəxslər arasında bölüşdürülərək şəxsi ehtiyaclara sərf edildiyi aşkar edilib.
Bununla da təqsirləndirilən şəxs zərərçəkmişlərə ümumilikdə 237 600 manat ziyan vurub. (Pravda.az)
Bizim.Media
