Xəbər verdiyimiz ki, Respublikaçı Alternativ Partiyası (REAL) boş qalmış dairələrə seçkilərin keçirilməsi üşün imza toplama kampaniyasına start verməyi qərarlaşdırıb. Belə ki, partiya sədri İlqar Məmmədov sosial şəbəkə hesabından sözügedən məsələ ilə bağlı məlumat verib.
İlqar Məmmədov REAL-ın Xətai rayonu üzrə 33 və 35 saylı seçki dairələrində seçicilərin imzasının toplayacağını qeyd edərək, digər partiyalara daha 3 boş qalan dairədə oxşar addımı atmaq təklifini irəli sürüb.
Məsələnin nə qədər qanuni olub-olmamasını elə digər partiyaların sədrlərindən soruşduq.
Milli Dirçəliş Hərəkatı Partiyasının sədri Fərəc Quliyev Bizim.Media-nın sorğusuna cavab olaraq bildirdi ki, belə bir qanuni təfsir yoxdur:
“Boş qalmış yerlərə seçkilərin keçirilməsi üçün Prezidentin sərəncamı lazımdır. Və bundan sonra seçkiyə uyğun olaraq, namizədlərin verilməsi, imza toplanılması mexanizmi işə düşür. Mənə elə gəlir ki, indi belə bir tədbirin həyata keçirilməsi qanuni deyil”.
MÖVZU İLƏ BAĞLI:
REAL parlamentdə boş qalan yerlərə iddiasını ortaya qoydu - İlqar Məmmədovdan AÇIQLAMA
Ağ Partiyanın başqanı Tural Abbaslı da seçici imzasının toplanması ilə belə bir prosesin başlanmasını ağıla batan hesab eləmədi:
“Düşünmürəm ki, seçkilərin keçirilməsi üçün seçicilərin imzasını toplamaqla boş qalmış dairələrə seçki elan olunsun. Odur ki, bizim hələləik belə müraciət etmək fikrimiz yoxdur. Biz daha konkret işlərlə məşğul olmağın tərəfdarıyıq. Boş qalan dairələrə seçkilərin keçirilməsi isə lazımdır, bunu qanuni şəkildə tələb edirik”.
Murad Əhmədov, Bizim.Media
