Rusiyanın Cənubi Qafqazda maraqları tam təmin olunmayanadək Qarabağ münaqişəsinin həlli mümükün deyil.
Bu fikri politoloq Sülhəddin Əkbər Azərbaycan və ermənistan prezidentrlərinin bu gün Parisdə keçriləcək görüşü ilə bağlı mövqeyini Moderator.az-a açıqlayarkən deyib.
Onun sözlərinə görə, bölgədə, həm Azərbaycanda, həm Ermənistanda nə qədər ki, Rusiyanın hərbi-siyasi təsiri dominant rol oynayır, bu münaqişənin həlli mükün deyil:
“Bu münaqişənin həlli ancaq hər iki ölkə Putin Rusiyasının layihələrinə tam şəkildə qoşulduğu halda mümkün ola bilər. Bu isə Ermənistanı demirəm, Azərbaycanın milli maraqlarına, müstəqilliyinə, ərazi bütövlüyü prinsiplərinə ziddir. O baxımdan belə görüşlərin harada keçirilməsindən, Vaşınqtonda və yaxud Parisdə keçirilməsindən asılı olmayaraq nəticəsi olmayacaq. Sadəcə Qərb Ukrayna böhranından sonra anlayır ki, postsovet məkanındakı münaqişələr nəinki Avropaya, eyni zamanda qlobal təhlükəsizliyə ciddi təhdiddir və istənilən vaxt alovlana bilər. Ona görə də çalışırlar ki, bu konfliktlərin həllində səylərini artırsınlar və bu yolla təşəbbüsü Rusiyanın alindən alamağa çalışırlar. Ancaq mövcud geopolitik konyukturada bu mümkün görünmür.”
S. Əkbər bu gün Xankəndində iki azərbaycanlı əsir üzərində məhkəmənin başlanmasını da elə prezidentlərin Paris görüşünə bir mesaj hesab edir:
“Yəni Rusiya Paris görüşündən xoşhal olmadığından, məhkəmənin bu günə salınmasını görüşdə bir neqativ ab-hava yaratmağa yönəlib.”
Millət vəkili Fazil Mustafa da prezidentlərin Paris görüşündən nəticə gözləmədiyini bildirdi:
“Çünki beynəlxalq aləmdə elə bir ciddi situyasiya və ya dəyişiklik yaranmayıb ki, bu görüşdən nəsə müsbət nəticə gözləmək olsun.”
Millət vəkilinin fikrincə, bu məsələnin həllində o zaman yenilik gözləməyə dəyər ki, o vaxt Rusiya ilə ABŞ arasında münaqişələrin həlli ilə bağlı mövqelərdə dəyişiklik olsun:
“Bu gün bu iki ölkə arasında çox böyük problemlər yaşandığından münaqişələrin həlli istiqamətində nəyinsə baş verəcəyini gözləməyə dəyməz. O baxımdan bu görüş formal xarakter daşıyacaq. Düzdür, bu görüşdə Azərbaycan prezidenti ölkəmizin maraqlarını ciddi şəkildə növbəti dəfə ortaya qoyacaq, amma danışıqlarda irəliləyiş gözləmirəm. Danışıqlarda yeniliyin olması üçün ABŞ-la Rusiya arasında münaqişələrə baxışda dəyişiklik olmalıdır. Bu dəyişiklik baş verməyənədək nəsə gözləməyə dəyməz.”
Millət vəkili azərbaycanlı əsirlər üzərində məhkəmənin prezidentlərin Paris görüşünə bir mesajın olduğu qənaətindədir.
