Ermənistan Baş naziri Nikol Paşinyan Prezident İlham Əliyevə Azərbaycanın Ermənistana yüklərin tranzitinə dair bütün məhdudiyyətləri aradan qaldırılmasına görə təşəkkür edib.
Bizim.Media xəbər verir ki, o, bu barədə Tbilisidə keçirilən V yubiley İpək Yolu Forumunda çıxışı zamanı deyib.
“Bu gündən etibarən yük maşınlarının Türkiyədən Azərbaycana və Azərbaycandan Türkiyəyə Ermənistan ərazisindən tranzitini təmin etməyə hazırıq”, deyə o, əlavə edib.
Onun sözlərinə görə, Ermənistan hökuməti Azərbaycanla əldə edilmiş sülh razılaşmasının həyata keçirilməsi üzərində işləyir.
Qeyd edək ki, dünən Prezident İlham Əliyev Astanada Qazaxıstan Prezidenti Kasım-Jomart Tokayevlə birgə mətbuata bəyanatında bildirib ki, Azərbaycan işğal dövründən mövcud olan Ermənistanla yük tranziti məhdudiyyətlərinin hamısını aradan qaldırıb.
Bizim.Media
