İlham Əliyev seçki monitorinqinin yekunlarına görə lider oldu

 Moderator.az-ın verdiyi xəbərə görə, 04 oktyabr 2013-cü il tarixdə Beynəlxalq Mətbuat Mərkəzində QHT Əməkdaşlıq Alyansının həmsədrləri Rufiz Qonaqov, Rəfail Becanov və Yadigar Məmmədli 9 oktyabr 2013-cü ildə keçiriləcək Prezident seçkisinin uzunmüddətli monitorinqinin yekun nəticələri ilə bağlı mətbuat konfransı keçirib.

Alyansın həmsədri Rufiz Qonaqov çıxış edərək bildirib ki, Prezident seçkisinin monitorinqinin ikinci mərhələsi də artıq yekunlaşıb. Bu mərhələ 12 sentyabrdan başlanıb:” Bu mərhələdə 5 regionda monitorinqlər aparıldı. Ümumilikdə 11 region əhatə olundu. 11 regionda 78 rayonu əhatə etmişik. Monitorinqə ümumilikdə 19 500 nəfər respondent cəl olunub. Əsas məqsədimiz əhalinin seçki hazırlığını müşahidə etmək, partiyaların və namizədlərin reytinqini müəyyənləşdirmək, onların hansı partiya və namizədə inandığının monitorinqinin aparılması olub. “Prezidentliyə namizədlərdən daha çox hansına inanırsınız” sualına rəyi öyrənilən respondentlərin 86.46 %-i prezident İlham Əliyevə inandıqlarını bildiriblər. 6.54 % Milli Şuranın vahid namizədi Cəmil Həsənliyə, 2.5 % Ümid Partiyasının sədri İqbal Ağazadəyə, 2.4 % Qüdrət Həsənquliyevə, 0.70% Sərdar Cəlaloğluna, 0.44 % Zahid Oruca, 0.43% İlyas İsmayılova, 0.53% isə digər namizədlərə inandıqlarını bildiriblər. “Bu gün seçki keçirilərsə, kimə səs verərdiniz” sualına cavabda da İlham Əliyev böyük üstünlüklə irəlidədir. Monitorinqə cəlb edilən 19 500 nəfərin 86.46 %-i, yəni 16 860 nəfəri “İlham Əliyevə səs verərdim” deyə cavab verib. Onlardan 6.54%-i, yəni 1276 nəfəri isə Milli Şuranın namizədi Cəmil Həsənliyə, 2.5%, 487.5 nəfər İqbal Ağazadəyə, 2.4 %-i, 467.75 nəfər isə Qüdrət Həsənquliyevə,  2.1%-i, yəni, 408.75 nəfər isə digər namizədlərə “səs verərdim” deyə cavab verib.

Alyansın həmsədri Rəfail Becanov bağlı bildirib ki, namizədlərin reytinqi müəyyənləşdirilən kimi, siyasi partiyaların da yekun reytinqlərinin öyrənilməsi monitorinqin əsas predmetlərindən biri olub. Siyasi partiyaların azad fəaliyyət imkanlarını ölkədə demokratik şəraitin mövcudluğu, müasir sivil cəmiyyətin formalaşması, insanların siyasi baxışlarını azad ifadə etməsinin nümunəsi sayan 91% respondentin fikrincə, bu ölkəmizin demokratik dəyərlərə sayğısı və Azərbaycanın demokratik inkişaf yolunda olmasının təzahürüdür. Partiyaların reytinqində də birincilik YAP-a məxsusdur: ”Partiyaların fəaliyyətini dəyərləndirən respondentlərin 16860 nəfəri, yəni 86,46%-i YAP-ın fəaliyyətini daim müşahidə etdiklərini, bu partiyanın reytinqinin yüksək və üzvlərinin sayının çox olduğunu bildiriblər. Respondentlərin 2.640 nəfəri, yəni 13.54%-i isə digər partiyaların fəaliyyətini yüksək qiymətləndiriblər. Bu sırada isə 2.87%-lə AXCP, 2.82 %-lə Müsavat, 1.62 %-lə KXCP, 1,43%-lə ALP, 1.36%-lə Ümid, 1.18%-lə BAXCP  qərarlaşıb. 2.26% Ədalət, ASDP, MMP və digət partiyalar arasında bölünür. Monitorinqin və sorğunun nəticələrindən aydın olur ki, YAP və onun prezidentliyə namizədi İlham Əliyev sabit elekorata malikdir”

Alyansın həmsədri Yadigar Məmmədli ölkədəki seçki mühiti ilə bağlı çıxış etdi: O, bildirdi ki, 11 regionda aparılan monitorinq zamanı hər hansı qanun pozuntusu aşkarlanmayıb. İmzatoplama kampaniyası, namizədlərin qeydiyyatı kimi seçki təşviqatı prosesi də özünəməxsus və hər hansı problem müşahidə edilmədən keçirilib. Namizədlərə seçki təşviqatı ilə bağlı 68 rayon mərkəzində mitinq və kütləvi tədbirlər keçirilməsi üçün açıq və qapalı yerlər ayrılıb. Pulsuz təşviqat kampaniyasının aparılmasına, ictimai televiziyada (İTV) və  radioada, o cümlədən rəsmi dövlət qəzetləri olan “Azərbaycan” və “Xalq” qəzetlərində ödənişsiz təşviqat üçün imkan yaradılıb. Qeyd edək ki, namizədlərə təşviqat üçün yaradılan şərait ekspertlər tərəfindən də müsbət qiymətləndirlir. Kampaniya dövründə prezidentliyə namizədlər hər həftə 3 saat İctimai Televiziyanın, 3 saat isə radionun imkanlarından istufadə edərək, seçicilərə öz fikir və platformalarını çatdıra biliblər. Açıq havada seçicilərlə görüş keçirmək üçün də imkanlar yaradılıb. İstər Bakı şəhərində, istərsə regionlarda namizədlər həm açıq havada, həm də qapalı zallarda seçicilərlə müxtəlif formatlı görüşlər keçiriblər. Keçirilən mitinq və görüşlərdə hər hansı insident və hüquq-mühafizə orqanlarının müdaxiləsi halları müşahidə edilməyib. Bu da onu göstərir ki, seçki təşviqatı seçki qanunvericiliyinə uyğun olaraq baş tutub”.

Daha sonra layihənin icraçı təşkilatlarının rəhbərləri və ekspertləri çıxış edərək, monitorinqin 2-ci mərhələsinin ayrı-ayrı regionlar üzrə nəticələrini elan ediblər. “Media və Mülki Cəmiyyət” İB-nin sədri, layihənin eksperti Xanoğlan Əhmədov Ağdaş-Göyçay və Şirvan bölgəsində monitorinqin nəticələri açıqlayıb: “İki bölgə üzrə 12 rayon əhatə olunub və 3000 nəfər respondentin rəyi öyrənilib”.  Layihənin icraçı təşkilatlarından olan Demokratik Cəmiyyət və Qadın Hüquqlarının Müdafiəsi İB-nin sədri  Mehriban Abdullayeva Naxşıvan Muxtar Respublikası və Bakı-Sumqayıt  regionu üzrə nəticələri elan edib. O, bildirib ki, iki bölgədə 19 rayon üzrə monitorinqə 4750 nəfər cəlb edilib. Alyansın üzvü, layihənin eksperti Nərgiz Nağıyeva isə Qarabağ və işqal olnumuş rayonlar üzrə məlumat verib: “Biz 7 rayonu əhatə etmişik. Bu rayonlarda 1750 nəfər respondent monitornqə cəlb olunub”.

Xatırladaq ki,  QHT Əməkdaşlıq Alyansı Azərbaycan Respublikasının Prezidenti yanında QHT-lərə Dövlət Dəstəyi Şurasının maliyyə dəstəyi ilə «2013-cü il Prezident seçkisinin monitorinqinin aparılması və vətəndaş cəmiyyəti institutlarının prosesdə iştirakının təşkili» layihəsini həyata keçirir. Monitorinqə ümumilikdə 19 500 nəfər respondent cəlb olunub. 11 regionda 78 rayonda monitorinq aparılıb.

Alyansın monitorinq hesabatı, namizədlərin və partiyaların yekun reytinq cədvəlləri Press-relizə əlavə olunur.