Deputat seçilən Fariz İsmayılzadə Lənkəran sakinlərinə TƏŞƏKKÜR ETDİ: "Birlikdə qazandıq!” – FOTO

Xəbər verdiyimiz kimi, Mərkəzi Seçki Komissiyası ötən gün keçirilən növbədənkənar parlament seçkilərinin nəticələrini açıqlayıb.

Bizim.Media sfera.az-a istinadən xəbər verir ki, seçkilərdə qalib gələn şəxslər arasında 77 saylı Lənkəran Şəhər Seçki Dairəsindən deputatlığa namizəd olan Fariz İsmayılzadə də olub.


O, seçkilərin nəticələri ilə bağlı fikirlərini bölüşüb. Bununla bağlı sosial media hesabında paylaşım edib. “Əziz dostlar, vəkillər, Lənkəran ziyalıları, təbliğat-təşviqat kampaniyası zamanı mənə olan etimadınıza, göstərdiyiniz dəstəyə görə sizlərə minnətdaram! Bütün könüllülərimizə dəstək olduqları üçün təşəkkür edirəm! Qələbəmiz bizim birlikdə komanda işimizin nəticəsidir”, - F.İsmayılzadə vurğulayıb.


Qeyd edək ki, Fariz İsmayılzadə təbliğat-təşviqat kampaniyası çərçivəsində ən aktiv, yüksək fəallıq nümayiş etdirən namizədlər sırasında yer alıb. O, seçki prosesində Milli Qəhrəmanların ailələri ilə görüşüb, seçicilərlə ayaqüstü söhbət edib, onlara seçki platforması ilə bağlı məlumat verib, şəhidlərin məzarını ziyarət edərək onların ailə üzvləri ilə görüşlər keçirib.


Bildirək ki, F.İsmayılzadə 2 sentyabr 1978-ci ildə Lənkəranda anadan olub. O, 1996–2000-ci ildə Qərb Universitetinin Beynəlxalq münasibətlər fakültəsinin politologiya ixtisası üzrə bakalavr, 2000–2002-ci illərdə ABŞ-nin Vaşinqton Universitetində sosial və iqtisadi inkişaf ixtisası üzrə magistr təhsili alıb, hər iki təhsil müəssisəsini fərqlənmə diplomu ilə bitirib. 2013–2015-ci illərdə İspaniyanın Madrid şəhərində yerləşən Beynəlxalq Biznes Məktəbində təhsil alaraq buranı "Ekzekyutiv MBA" ixtisası üzrə bitirib, ardınca Niderlandın Maastrixt Menecment Məktəbində doktorantura üzrə təhsil alaraq 2021-ci ildə fəlsəfə doktoru elmi dərəcəsini alıb.


Fariz İsmayılzadə 2003–2005-ci illərdə Beynəlxalq Miqrasiya Təşkilatında müxtəlif qısamüddətli layihələrdə koordinator və menecer vəzifələrində çalışıb. 2006-cı ildə "ADA" Universitetinin prorektoru təyin edilib, beynəlxalq əlaqələr, 120 xarici universitet ilə mübadilə proqramları, ixtisasartırma proqramları, tədqiqat və sponsorluq layihələri, korporativ və hökumət tərəfdaşları ilə əlaqələr, marketinq və media əlaqələri sahələri üzrə kurator olub. Avropa İttifaqı üzrə Bilik Mərkəzinə, Xəzər Enerji və Ətraf Mühit Mərkəzinə və İnkişaf və Diplomatiya İnstitutuna rəhbərlik edib.


O həmçinin, Azərbaycan Respublikası Prezidentinin 18 aprel 2016-cı il tarixli Sərəncamına əsasən Dövlət İmtahan Mərkəzinin Direktorlar Şurasının üzvü təyin edilib. Azərbaycan Milli Təhsil Strategiyası işçi qrupunun üzvü (2012-ci il), Azərbaycan Respublikasının işğaldan azad edilmiş ərazilərində məsələlərin mərkəzləşdirilmiş qaydada həlli ilə bağlı Əlaqələndirmə Qərargahının Elm, Təhsil və Mədəniyyət məsələləri üzrə İşçi Qrupunun üzvüdür. F.İsmayılzadə Azərbaycan Respublikası Prezidentinin 9 iyul 2019-cu il tarixli Sərəncamına əsasən Azərbaycan Respublikasının diplomatik xidmət orqanlarında səmərəli fəaliyyətinə görə "Tərəqqi" medalı ilə, 2019-cu ildə Azərbaycan Respublikası Xarici İşlər Nazirliyi tərəfindən “Azərbaycan Respublikası diplomatik xidmət orqanlarının 100 illiyi (1919–2019)” yubiley medalı ilə təltif edilib.

Bizim.Media