İqbal Ağazadənin Seçki Qərargahından Moderator.az-a daxil olan məlumatı təqdim edirik:
"90 saylı Ağdaş Seçki Dairəsində Cavid Osmanovun təşkilatçılığı ilə baş verən qanunsuzluqlar səngimək bilmir. Bu qanunsuzluqlar hər gün yeni formada, yeni adamların iştirakı ilə həyata keçirilir. Seçkiyə qanunsuz müdaxilə edənlər sırasına daha bir məmur da qoşulub.
Yerli icra hakimiyyətinin ərazi idarəetmə və yerliözünüidarəetmə orqanları ilə iş şöbəsinin müdiri Həsənov Əsgərxan İsmayıl oğlu qanunsuzluqların baş verməsində Cavid Osmanov qədər canfəşanlıq edir. O, İqbal Ağazadənin seçki Qərargahı ilə əlaqə saxlayan, ofis və başqa əmlaklarını icarəyə verən şəxsləri bir-bir kabinetinə dəvət edərək hədə-qorxu gəlir. Etdiyi hərəkətlərin məsuliyyətini dərk etməyən bu məmur bilməlidir ki, seçki prosesinə qanunsuz müdaxilə cinayət məsuliyyəti yaradır və biz bu proseslə bağlı həm səlahiyyətli dövlət qurumlarına, həm də hüquq-mühafizə orqanlarına müraciət edəcəyik.
Əlimizdə kiçik bir məmurun rayon ərazisində törətdiyi qanunsuzluqlarala bağlı kifayət qədər material var. Fəaliyyətini belə qanunsuzluq və canfəşanlıq üzərində qurulmasının səbəbləri bizə aydındır. Əsgərxan Həsənov Cavid Osmanovun deputat seçilməsinə ona görə çalışır ki, seçkidən sonra I müavin olmaq imkanlarını genişləndirsin. Amma unutmasın ki,etdiyi qanunsuzluqlar barədə əlimizdə olan materiallar onun indiki vəzifəsi ilə də vidalaşmasına səbəb ola bilər. Hər kəs ona həvalə edəilən vəzifəni qanun çərçivəsində icra etməli, vəzifəsindən sui-istifadə etməməli, vəzifə səlahiyyətlərini aşmamalı, vətəndaşına və dövlətinə xidmət etməlidir. Tutduğu vəzifənin səlahiyyətlərini dərk etməyən, qanunlara hörmət etməyənlər gec, ya tez qanun qarşısında cavab verməli olurlar.
Qeyd edək ki, İqbal Ağazadənin imzatoplama kampaniyasında Ağdaş Rayon İcra Hakimiyyətinin birinci müavini, YAP-ın Ağdaş şöbəsinin sədri, 90 saylı Ağdaş Seçki Dairəsindən namizədliyi qeydə alınmış Cavid Osmanovun qanunsuz təşkil etydiyi dəstələr kampaniyaya qanunsuz müdaxilə etmişdi. İmza toplayanlar və səlahiyyətli nümayəndlər təhdid , təzyiq və təqibə məruz qalmışdılar.Mayın 10-dan etibarən isə İqbal Ağazadəyə imza vermiş şəxslərə qarşı təzyiq və təqiblər başlamışdı. Məsələnin dəfələrlə mətbuatda işıqlandırılmasına, bəyanatların verilməsinə,MSK-ya, Baş prokurorluğa və DİN-ə müraciət olunmasına baxmayaraq Cavid Osmanovun təşkil etdiyi bu qeyri-qanuni hərəkətlər səngimək bilmir.
