Rusiya bazarı sanksiyalar ərəfəsində çökür – STATİSTİK RƏQƏMLƏR 

Rusiya birjası Rusiya prezidenti Vladimir Putinin bir gün əvvəl DXR və LXR-nin müstəqilliyini tanımaq qərarından sonra çərşənbə axşamı səhər ucuzlaşmağa davam edir. Qərb ölkələri artıq bu addıma cavab olaraq yeni sanksiyalar elan ediblər və indi investorlar səbirsizliklə gələcək hadisələri gözləyirlər. Səhər Moskva birjasının indeksi təxminən 2,8% itirərək 2950 bənd səviyyəsinə enib.

Bizim.Media xəbər verir ki, bu haqda informasiya “finam.ru” saytında yerləşdirilib.

Rusiya bazarı üçün ənənəvi əhəmiyyət kəsb edən amillər, məsələn, neftin qiyməti hələ də əsas rol oynamır, çünki geosiyasi hadisələr rubl aktivləri üçün çox vacib olub. Bu arada, neftin qiyməti durmadan artır və Brent markalı neftin bir barreli üçün 100 dollar işarəsi artıq üfüqdə görünür. Bu səhər Brent markalı neftin qiyməti təxminən 2% artaraq 97,3 dollar/barelə, WTI markalı neftin qiyməti 3,4% artaraq 93,3 dollara çatıb.

Avropa indeksləri ötən günü qırmızı ilə başa vurub, dünən ABŞ-da ticarət olmayıb və ABŞ fond göstəricilərinin fyuçersləri bu gün ucuzlaşır. Asiya da “qırmızı” zonadadır.

Rusiya bazarında əvvəlki ticarət günü artan geosiyasi risklər fonunda böyük çöküşlə başa çatıb. Moskva birjasının indeksi 10,5% azalaraq 3036,88 bənd, RTS indeksi 13,21% azalaraq 1207,5 bənd təşkil edib. Düşmə liderləri neft-qaz sektorunun və bankların səhmləri olub: Rosneft (-18,3%), Surgutneftegaz (-10,3%), Qazprom (-10,12%), VTB (-17,3%), Sberbank (-16,9%).

Rubl da bir gün əvvəl ucuzlaşıb və hazırda 1 dollar 80-dən aşağı düşüb, lakin indiyədək sabitləşə bilib. Bu gün səhər saatlarında dollar Rusiya valyutasına qarşı 0,05% artaraq 79,82, avro isə 0,19% bahalaşaraq 90,32 olub.
Promsvyazbank-ın baş analitiki Yeqor Jilnikov hesab edir ki, dollar bu gün 79-81 rubl diapazonunda möhkəmlənəcək.

Ekspert hesab edir ki, rublun fundamental mənzərəsi güclü olaraq qalsa da, geosiyasi risk milli valyutanın ədalətli dəyərinin dəyişməsinə səbəb ola bilər.

RUSAL səhmləri bu gün Honq Konq birjasında təxminən 20% ucuzlaşıb. “Moscow Partners” İQ-nin prezidenti Yevgeni Koqanın sözlərinə görə, bu, 2018-ci ilin aprelindən bəri ən böyük enişdir. 

Bizim.Media