ABŞ və İsrailin 28 fevraldan etibarən İrana qarşı həyata keçirdiyi hərbi əməliyyatlar ölkənin hərbi-siyasi elitasına ağır zərbələr vurub. Müxtəlif mənbələrdə yayılan məlumatlara görə, zərbələr nəticəsində İranın bir sıra yüksək rütbəli hərbi və təhlükəsizlik rəsmiləri öldürülüb və ya zərərsizləşdirilib. Bu hadisələr ölkədə hakimiyyət balansına ciddi təsir göstərib və qərarvermə mexanizmi ilə bağlı yeni suallar yaradıb.
Bizim.Media ABŞ-İsrail hücumları zamanı öldürülən yüksək səviyyəli şəxslərin siyahısını təqdim edir.
Seyyid Əli Xamenei
Müharibənin ilk günlərində hədəfə alınan əsas fiqurlardan biri İranın Ali Rəhbəri Əli Xamenei olub. Uzun illər ölkənin ən güclü siyasi və dini fiquru sayılan Xamenei İranın bütün strateji qərarlarının mərkəzində dayanırdı. Onun öldürülməsi ölkənin siyasi sistemində böyük sarsıntı yaradıb və hakimiyyət daxilində ciddi boşluq formalaşdırıb.
Əziz Nəsirzadə
Hərbi rəhbərlikdə itkilər sırasında İranın müdafiə naziri Əziz Nəsirzadə də var. O, İranın müdafiə strategiyasının hazırlanmasında və ölkənin hərbi modernləşmə proqramlarında mühüm rol oynayan fiqurlardan biri hesab olunurdu.
Məhəmməd Pakpur
İranın əsas hərbi strukturlarından biri olan İnqilab Keşikçiləri Korpusunun yüksək rütbəli komandirlərindən sayılan Məhəmməd Pakpur da zərbələr nəticəsində öldürülən şəxslər arasında göstərilir. Pakpur SEPAH-ın Quru Qoşunlarının rəhbəri biri kimi regiondakı hərbi əməliyyatlarda mühüm rol oynayırdı.
Əli Şəmxani
İranın təhlükəsizlik sistemində mühüm fiqurlardan biri olan Əli Şəmxani uzun illər ölkənin təhlükəsizlik strategiyasının formalaşdırılmasında iştirak edib. O, həm də ali rəhbərliyə yaxın fiqurlardan biri hesab olunurdu və İranın regional siyasətində təsirli rol oynayırdı.
Əbdülrəhim Musəvi
İran Silahlı Qüvvələrinin Baş Qərargah rəisi kimi fəaliyyət göstərən Abdülrəhim Musəvi də hücumların hədəfinə çevrilən hərbi rəhbərlərdən biri kimi qeyd olunur. Musəvi İran ordusunun əməliyyat planlaşdırılmasına və strateji hərbi qərarların qəbuluna cavabdeh olan əsas şəxslərdən idi.
Əli Laricani
İsrail tərəfinin iddiasına görə, İranın təhlükəsizlik strukturlarında mühüm mövqeyə malik olan Ali Laricani də Tehrana endirilən zərbələr nəticəsində öldürülüb. O, İranın siyasi sistemində uzun illər müxtəlif yüksək vəzifələrdə çalışmış və təhlükəsizlik siyasətinin formalaşdırılmasında iştirak etmiş fiqurlardan sayılırdı.
Qulamreza Süleymani
“Bəsic” təşkilatı İran daxilində təhlükəsizliyin təmin olunması, kütləvi səfərbərlik və ideoloji nəzarət funksiyalarını yerinə yetirən ən böyük paramilitar şəbəkələrdən biri sayılır. Bu struktur həm daxili təhlükəsizlikdə, həm də regionda İranın təsir dairəsinin qorunmasında mühüm rol oynayır.
Mart ayında ABŞ və İsrailin İrana qarşı həyata keçirdiyi hücumlar zamanı Qulamreza Süleymaninin də öldürülüb. Onun ölümü İranın təhlükəsizlik sistemində ciddi itki kimi qiymətləndirilir. Çünki o, ölkə daxilində geniş təşkilatlanma şəbəkəsinə malik olan “Bəsic” qüvvələrinin idarə olunmasında əsas fiqurlardan biri idi.
Ekspertlərin fikrincə, bu itkilər İranın siyasi və hərbi idarəetmə sisteminə ciddi təsir göstərib. Ənənəvi olaraq ölkədə qərarlar ali dini rəhbərlik, təhlükəsizlik strukturları və hərbi elita arasında bölüşdürülürdü. Lakin hazırkı vəziyyətdə güc balansının daha çox hərbi strukturların-xüsusilə İnqilab Keşikçiləri Korpusunun əlində cəmləşdiyi qeyd olunur. (Modern.az)
Bizim.Media
