Türk kofesi Avropa İttifaqında TSG (Traditional Speciality Guaranteed – “Zəmanətli ənənəvi ixtisaslaşma”) statusu qazanıb və beləliklə, bu siyahıya daxil olan Türkiyədən ilk məhsul olub.
Bizim.Media xəbər verir ki, bu barədə informasiyanı Türkiyə Palatalar və Birjalar Birliyi yayıb.
Mənbə qeyd edir ki, qeydiyyat 5 noyabrda Aİ-nin rəsmi bülletenində təsdiqlənib və üç ay ərzində etiraz edilmədiyi halda qüvvəyə minəcək.
“Üç aylıq müddət bitdikdən sonra türk kofesi Aİ-də qeydiyyatdan keçmiş ilk ənənəvi türk məhsulu adını alacaq. Türk kofesi mədəniyyətimizin ən vacib simvollarından biridir.
O, həmçinin YUNESKO-nun Qeyri-maddi Mədəni İrs Siyahısına da daxil edilib. 500 ildən çox tarixi olan bu içki sadəcə bir içki deyil, həm də qonaqpərvərliyin, ünsiyyətin və dostluğun simvoludur,” – deyə Birliyin açıqlamasında bildirilir.
TSG statusu məhsulun hazırlanma üsulunu və tərkibini qoruyur, lakin onu müəyyən coğrafi bölgə ilə əlaqələndirmir. Bu qeydiyyat məhsulu saxtalaşdırılmadan və məqsədyönsüz istifadədən qorumağa xidmət edir. (Mənbə: Sondakika)
Bizim.Media
