Azərbaycan İslamiadada ağırlıqqaldırma növündə ilk medalını qazandı - FOTO 

Azərbaycanın ağırlıqqaldıranı Nazilə İsmayılova Türkiyənin Konya şəhərində təşkil olunan V İslam Həmrəyliyi Oyunlarında bürünc medal qazanıb. 

Bizim.Media xəbər verir ki, Oyunlarda 45 kiloqram çəki dərəcəsində mübarizə aparan idmançımız birdən qaldırma hərəkətində 54 kiloqramlıq nəticə göstərib.

Təmsilçimiz təkanla qaldırmada isə 67 kiloqramı başı üzərinə qaldırıb. İki hərəkətin cəmində, 121 kiloqramlıq nəticə göstərən N.İsmayılova bürünc medal qazanıb. 

Yarışın qalibi İndoneziya təmsilçisi Siti Nafisatul Hariroh olub. Türkiyə idmançısı Cansu Bektaş gümüş medal qazanıb. İdmançımızın çıxışını gənclər və idman naziri Fərid Qayıbov və nazir müavini Mariana Vasileva da izləyiblər. 

Qeyd edək ki, V İslam Həmrəyliyi Oyunları 2021-ci ildə keçirilməli olsa da, qlobal pandemiya səbəbindən yarış bir il təxirə salınıb. Avqustun 18-dək davam edəcək V İslam Həmrəyliyi Oyunlarında 56 ölkədən 4 mindən çox atlet idmanın 24 növü üzrə 483 dəst medal uğrunda mübarizə aparır. 
Oyunların məhz Konyada keçirilməsi təsadüfi deyil. Qədim tarixi olan Konya şəhəri həm də İslam sivilizasiyasının mühüm mərkəzlərindən sayılır. Böyük təsəvvüf şairlərindən olan Cəlaləddin Ruminin türbəsi zahidlər üçün ziyarətgahdır. Ümumiyyətlə, Konya müxtəlif mədəniyyətlərin bir araya gəldiyi harmonik ruha sahibdir. 

Xatırladaq ki, 2017-ci il mayın 12-22-də Bakıda keçirilmiş IV İslam Həmrəyliyi Oyunları Prezident İlham Əliyevin rəhbərliyi, Birinci vitse-prezident və Təşkilat Komitəsinin sədri Mehriban Əliyevanın fəaliyyəti sayəsində bütün dünyaya nümayiş etdirdi ki, İslam aləmi bir ola bilir və bu birlik gücümüzü daha da artırır. “Bakı-2017”də 54 ölkədən 3 mindən çox atlet idmanın 24 növü üzrə keçirilən yarışlarda 269 dəst medal uğrunda mübarizə aparıb. Bu Oyunlara 425 atletlə qatılan Azərbaycan 162 medalla (75 qızıl, 50 gümüş və 37 bürünc) birinci oldu.

Türkiyə ikinci (195 medal), İran üçüncü (98 medal), Özbəkistan dördüncü (63 medal), Bəhreyn (21 medal) isə beşinci yerdə qərarlaşdı. 

İslam Həmrəyliyi Oyunları ilk dəfə Səudiyyə Ərəbistanının Ciddə şəhərində keçirilib. İranın paytaxtı Tehranda keçirilməli olan ikinci İslamiada ləğv edilib. Üçüncü Oyunlar 2013-cü ildə İndoneziyanın Palembanq şəhərində təşkil olunub. VI İslam Həmrəyliyi Oyunları isə 2025-ci ildə Kamerunun paytaxtı Yaundedə keçiriləcək. 

Bizim.Media