19 yaşlı oğlan 2 gündür itkin düşüb – FHN axtarışa qoşuldu 

İki gündür itkin düşən Mingəçevir sakinin Qarabağ kanalında batdığı güman edilir. 

Bizim.Media-nın məlumatına görə, 14 aprel tarixində axşam saatlarında evdən çıxaraq bir daha geri dönməyən 2003-cü il təvəllüdlü şəhər sakini Əhmədov Allahverdi Zalış oğlunun doğmaları onun axtarışları üçün şəhər Polis Şöbəsinə müraciət edib. 

Polis əməkdaşları da ilkin araşdırma və ehtimallar üzərinə gəncin Yuxarı Qarabağ kanalının şəhərin Energetiklər yaşayış massivi ərazisindən keçən hissəsində batmış ola biləcəyini diqqətə alaraq FHN-nin aidiyyati xilasermə qurumlarını məlumatlandırıb. 

Buna müvafiq olaraq dalğıc axtarış qrupu kanalda axtarışlara başlayıb. 

Qeyd edək ki, kanal üzərindəki körpüdə balıq tutan yerli sakinlərdən birinin verdiyi ilkin məlumata görə ərazidə gənc oğlan müşahidə edib, sonra isə kanaldan səs eşidib. 
Faktla bağlı araşdırmalar davam edir. 

Ehtiram Muradov, Bizim.Media