Bakıda tanışını armaturla döyən şəxs məhkəmə zalında həbs edildi

Bakıda tanışını amansızlıqla döyərək xəsarət yetirən Coşqun Novruzov 6 il müddətinə azadlıqdan məhrum edilib.

Bizim.Media xəbər verir ki, bu barədə hökm Bakı Ağır Cinayətlər Məhkəməsinin hakimi Azad Məcidovun sədrliyi ilə keçirilən prosesdə elan olunub.

O, məhkəmə zalında həbs edilib.

Qeyd edək ki, hadisə 2020-ci ilin noyabrında paytaxtın Sabunçu rayonu Bilgəh qəsəbəsində baş verib. Belə ki, C.Novruzov tanışı Adil Rəhimovu şəxsi münasibətlər zəminində aralarında yaranan mübahisə zamanı küt alətlə amansızcasına döyərək ona ağır xəsarət yetirib.

Xəsarət alan şəxs təcili tibbi yardım briqadasının köməkliyi ilə xəstəxanaya çatdırılıb. Ona sol təpə gicgah sümüyünün kəllə əsasına keçən xətti sınığı ilə müşayiət olunan başın küt travması diaqnozu qoyulub.

Faktla bağlı C.Novruzov və barəsində Cinayət Məcəlləsinin 126.2.3, 126.2.4 (Qəsdən sağlamlığa ağır zərər vurma) və 221.3-cü (Xuliqanlıq) maddəsi ilə ittiham irəli sürülüb.

C.Novruzov istintaq və məhkəmə dövründə polis nəzarətində olub.

Bizim.Media