İspaniya La Liqası: "Barselona" yenə xal itirdi – DİGƏR NƏTİCƏLƏR

Yanvarın 9-da futbol üzrə İspaniya La Liqasının 20-ci turunun mərkəzi qarşılaşması keçirilib.

Bizim.Media xəbər verir ki, "Santiaqo Bernabeo" stadionunda "Real Madrid" klubu "Valensiya" komandasını qəbul edib. Görüş “kral” klubunun 4:1 hesablı qələbəsi ilə başa çatıb.

"Real Madrid"in heyətində Kərim Benzema (43, 88) və Vinisius Junior (52, 61) fərqləniblər.

"Valensiya"nın isə yeganə qolunu 76-ci dəqiqədə Qonsalu Qedeş vurub.

"Real Madrid" vacib qələbə qazanaraq xal ehtiyatını 49-a çatdıraraq turnir cədvəlində liderliyini qoruyub.

"Valensiya" isə 29 xalla doqquzuncu yerdə qərarlaşıb.

Turun ən gözlənilməz hesabı "Qranada" klubu və "Barselona" komandaların arasındakı oyunda qeydə alınıb.

Belə ki, 57-ci dəqiqədə "Barselona" klubu Lük De Yonqun qolu sayəsində hesabda önə çıxsa da, matçın başa çatmasına bir dəqiqə qalmış "Qranada" hesabı bərabərləşdirərək məğlubiyyətdən xilas olub.

Antio Puertas fərqlənib.

Qarşılaşmanın 76-ci dəqiqəsində "Barselona"nın yarımmüdafiəçisi Qabi ikinci sarı vərəqəsini alaraq meydandan kənarlaşdırılıb.

Beləliklə, növbəti xal itkisi ilə üzləşən "Barselona" 32 xalla altıncı, "Qranada" isə 24 xalla 12-ci yerdə qərarlaşıb.

Qeyd edək ki, turun digər görüşləri yanvarın 9-da və 10-da keçiriləcək.

Bizim.Media