Göyçayın Aşağı Qaraməryəm kənd sakinləri illərdir içməli su üzünə həsrətdirlər. Kəndin bir hissəsi içməli su ilə təmin edilib amma yerdə qalan əhali isə qablarla kəndin içərisindən keçən arxdan su daşıyıb məişətdə istifadə edirlər. Bu da onların sağlamlığı üçün böyük risk yaradır.
Bu sözləri Bizim.Media-nın Aran bürosuna kənd sakinləri bildiriblər.
Sakinlər təmiz su istifadə etmək üçün 1 maşın suyu 10 manatdan alırlar. Aldıqları suyu bir həftə istifadə edə bilirlər. Ay ərzində təkcə suya ödədikləri məbləğ 30-40 manat civarında olur, bu da onların büdcələrinə uyğun deyil. Məişətdə istifadə üçün isə arx suyundan izolyasiya olunmadan istifadə edirlər. Sakinlər deyirlər ki, aidiyyati qurumlar kənddə də su qurğularının olacağı vədləri ilə illərdir onlara təskinlik verirlər. Kənd sakini Mətləb Qədirov bildirir ki, “30 ildir bu əziyyəti çəkirik dəfələrlə müraciət etməyimizə baxmayaraq bu günə kimi bizimlə heç bir qurum maraqlanmayıb”.
Digər kənd sakini Əli Zərbəliyev də şikayətlənir ki, “içməli suyu pulla alırıq qışda 2 maşın yayda isə 4 maşın su almalı oluruq çünki mala qaraya hamısına o sudan içiririk buda bizim büdcəmizə uyğun deyil”.
Mülayim Cəfərova isə suya pul çatmayanda məcbur olub kanalizasiyaların axıdıldığı arxın suyundan istifadə etdiklərini, deyir.
Qeyd edək ki, Aşağı Qaraməryəm kəndinin ərazisindən keçən Dəvəbatan su arxı bir neçə kəndin içindən keçir və əsas qollarından biri də sözügedən kəndin, demək olar, tən mərkəzindən axır. Əslində məsafə baxımından kənd sakinlərinin bu sudan istifadəsi çox əlverişlidir, amma su birbaşa içmək və məişətdə istifadə üçün yararlı deyil. Kənd əhalisi suda olan mikrobların səhhətlərində yarada biləcək riskləri gözə alaraq yenə də bu sudan istifadə etməli olurlar. Çünki başqa əlacları yoxdur. Bəs bu çarəsizlik nə vaxt bitəcək, sakinlər nə zaman təmiz və sağlamlığa ziyanı olmayan içməli suya qovuşaqcaqlar? Bu suallarla kənd icra nüməyəndəsinə müraciət etdik.
Kənd icra nümayəndəsi Rəhilə Xəlilova Bizim.Media-nın yerli bürosuna bildirdi ki, bizdə icra nümayəndəsi olaraq su idarəsinə müraciət etmişik və gəlib baxış keçiriblər amma onlar bildiriblər ki, bura sonuncu dəfə su xətti 90-cı illərdə çəkilib. Kəndin bu hissəsinə gəldikdə isə dövlət tərəfindən vəsait ayrılacağı təqdirdə kəndin bu hissəsinə su xətti çəkilə bilər. Məsələ ilə bağlı Azərsu Açıq Səhmdar Cəmiyyətinin mətbuat xidmətinin rəhbəri anar Cəbrayıllı Bizim.Media-nın yerli bürosuna bildirildi ki, hazırda həmin kənddə qurum xidmət göstərmir. Amma kənd və qəsəbələrin su təminatının yaxşılaşdırılması layihələri çərçivəsində gələcəkdə bu kəndə də su xəttinin çəkilməsi reallaşacaq.
Bizim.Media, Aran bürosu
