Balakən rayonu, Katex kəndi ərazisində yol boyunca “Qafqaz Səddi”nin qalıqları uzanır.
Bu barədə Bizim.Media-nın yerli bürosuna tarix üzrə fəlsəfə doktoru Akif Məmmədli məlumat verib.
MÖVZU İLƏ BAĞLI:
Kənd qayğılarını biznesə çevirən Zaqatala XANIMLARI – REPORTAJ/FOTO
Alimi narahat edən məsələ nədən ibarətdir?
Sualımıza cavab olaraq Akif müəllim bildirib ki, Yevlax-Zaqatala-Gücüstan magistralının bir neçə metrliyində yerləşən “Qafqaz Səddi ” V-VI (5-6-cı) əsrdə Sasani hökmdarı Qubad və oğlu Xosrov Ənuşirəvan tərəfindən tikdirilib. Səddin uzunluğu 120 km-dən çox olub.
“Qafqaz Səddi ” zaman-zaman dağıntılara məruz qalıb və ən son qalıqları Katex kəndinin ərazisinə düşüb. Alim təəssüf hissilə bildirib ki, abidənin önünə vurulan yeni lövhədə yazılıb: -Zaqatala qalasının qalıqları. Bu ciddi tarixi yanlışlığa görə Akif Məmmədli müvafiq orqan və təşkilatlara üzünü tutaraq soruşur:
“Bu məntiqsizliyə yol verən kimdir?”
Həmsöhbətimiz bildirib ki, bununla bağlı dəfələrlə elmi məqalələrdə, televiziya verilişlərində bəhs olunub:
“Bilməmək ayıb deyil, ancaq belə məntiqsiz və yanlış lövhə yazmaq çox ayıbdır! Özü də işlək Beynəlxalq avtomobil yolunun kənarında”, - deyən alim, məsələ ilə bağlı növbəti dəfə nazirlik və qurumlar qarşısında məsələ qaldırmaq üçün addım atmaq məcburiyyətində qalıb.
Qeyd edək ki, Zaqatala qalası XIX (19-cu) əsrdə, “Qafqaz Səddi ” isə V-VI (5-6-cı) əsrlərdə inşa olunub. Tarixi fərq çox böyük, yanlışlıq isə ciddidir.
Yazıda adı çəkilən qurumların da mövqeyini işıqlandırmağa hazırıq.
Tural Rasim oğlu, Bizim.Media, Şimal-Qərb bürosu
