Sumqayıt Şəhər İcra Hakimiyyəti yanında Mənzil-Kommunal Təsərrüfatı Birliyinin aprelin 6-da elan etdiyi “Sumqayıt şəhərində küçə və parklarda abadlıq işlərinin” və “Sahil küçəsində yolun asfalt örtüyünün əsaslı təmirinin” satın alınması ilə bağlı 2 tenderinin nəticələri və qalibləri açıqlanıb.
Bizim.Media xəbər verir ki, Sumqayıt MKTB ilə qalib elan olunan “Azərenerji Təchizat” MMC (VÖEN - 6402312081) və “Xezer Construction” MMC (VÖEN - 1603218151) arasında 2 milyon 947 min 270 manatlıq satınalma müqaviləsinin bağlanması nəzərdə tutulub.
MÖVZU İLƏ BAĞLI:
10 manatlıq şirkətlər milyonluq tenderlərdə qalib OLA BİLƏRMİ? – HÜQUQİ İZAH
Qeyd edək ki, nizamnamə kapitalı 10 AZN olan “Azərenerji Təchizat” MMC əldə edəcəyi 1 milyon 299 min 866 manat müqabilində Sumqayıt şəhərinin 20 Yanvar Pərviz Hüseynov, Z.Hüseynov, Ə.Kərimov, Kamran Hüseynov, M.Hüseynzadə küçələrində, Azərbaycan prospektində, o cümlədən 17-ci mikrorayonda, 9-cu mikrorayonda 58-ci binaya və Alman parkının yanı ilə kollecə gedən yoldakı səkilərdə, Sumqayıt Dövlət Universitetinin qarşısındakı parkda və Lüdviqshafen parkında təmir, bərpa və abadlıq işləri həyata keçiriləcək.
Bu şirkətin ciddi qanun pozuntusuna yol verdiyi aşkar olunub.
"Azərenerji Təchizat” MMC 26 noyabr 2019 tarixində 2 saylı Ərazi Vergilər Baş İdarəsi rərəfindən dövlət qeydiyyatına alınıb. Şirkətin hüquqi ünvanı Sumqayıt şəhəri, 46-cı məhəllədə yerləşir. MMC-nin qanuni təmsilçisi Çobanov Famil Eldar oğludur.
Əvvəlki qanuni təmsilçi isə Qafurzadə Xəyal Səlim oğlu olub. Bununla bağlı 2021-ci ildə reyestr məlumatlarına dəyişiklik edilib. Güman ki, bununla da qanuni təmsilçi dəyişib.
Açıq mənbələrdə “Azərenerji Təchizat” MMC və Famil Çobanov barəsində hər hansı məlumat yoxdur. Araşdırmalarımız zamanı bəlli olub ki, "Azərenerji Təchizat” MMC yarandığı gündən bəri yalnız Sumqayıtın yerli qurumlarının, əsasən də Sumqayıt Şəhər İcra Hakimiyyətinin elan etdiyi çoxmilyonluq tenderlərin qalibi olur.
Təkcə 2023-cü ildə Sumqayıt ŞİH və ona tabeli qurumların 4 tenderini qazanıb. Bura indi bəhs etdiyimiz tender də daxildir. Şirkətlə bağlanan satınalma müqavilələrinin ümumi maliyyə dəyəri isə 6 milyon 049 min 247 manat təşkil edir.
Diqqətə çatdırak ki, ötən ilin dekabr ayının sonlarına yaxın İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidməti dövlət satınalmalarında ciddi qanun pozuntusu ilə bağlı Baş Prokurorluğa müraciət edib.
Belə ki, müxtəlif dövlət qurumlarından daxil olmuş yekun protokollar təhlil edilərkən elektron satınalma vasitəsilə keçirilmiş açıq tenderlərdə iştirak üçün bəzi dövlət orqanları adından təqdim edilən sənədlərin sahibkarlar tərəfindən saxtalaşdırılmasına dair əsaslı şübhələr müəyyən edilib.
Saxtakarlığa yol verən sahibkarlar arasında “Azərenerji Təchizat” MMC də var.
“Dövlət satınalmaları haqqında” Qanunun “Dövlət satınalmalarında saxtakarlıq halları” ilə bağlı 12-ci maddəsində göstərilir ki, satınalan təşkilat satınalma prosedurları ilə bağlı hər hansı qərarın qəbul olunmasına təsir göstərmək məqsədi ilə malgöndərənin (podratçının) saxtakarlıqla məşğul olmasını müəyyənləşdirdikdə və bu, müvafiq icra hakimiyyəti orqanı tərəfindən təsdiq edildikdə, həmin malgöndərənin (podratçının) təqdim etdiyi tender təkliflərini, ofertaları və kotirovkaları rədd edir.
Bundan başqa, malgöndərənin (podratçının) gələcək satınalma prosedurlarında iştirakını qeyri-müəyyən müddətə və ya müvafiq icra hakimiyyəti orqanının müəyyənləşdirdiyi müddətə qadağan edir.
Eyni zamanda, saxtakarlıq hallarının araşdırılması üçün məlumatları müvafiq səlahiyyətli orqanlara təqdim edir, tender təklifinin, ofertanın və ya kotirovkanın rədd edilməsini və bunun səbəblərini satınalma prosedurları haqqında hesabatda göstərir və dərhal malgöndərənə (podratçıya) bildirir.
Sumqayıt MKTB-nin aprelin 12-də elan etdiyi “Sahil küçəsində yolun asfalt örtüyünün əsaslı təmiri işlərinin satın alınması” digər tenderinin qalibi isə “Xezer Construction” MMC (VÖEN - 1603218151) seçilib.
Tərəflər arasında bağlanacaq 1 milyon 647 min 404 manatlıq satınalma müsabiqəsinin şərrlərinə əsasən, şirkət Sahil küçəsində yolun asfalt örtüyünün əsaslı təmirini həyata keçirəcək.
Rövşən Ziya, Bizim.Media
