İyunda ölkəmizdə 55 sel hadisəsi qeydə ALINIB - RƏSMİ 

Yayın ilk ayı hava şəraitinin qeyri-sabit keçməsi ilə səciyyələnib. İyun ayında ölkə ərazisində yağıntılar əsasən dağlıq və dağətəyi rayonlarda leysan xarakterli intensiv və güclü olub.

Bizim.Media xəbər verir ki, bunu Milli Hidrometeorologiya Xidmətinin rəisi Nazim Mahmudov bildirib.

Qeyd edilib ki, ay ərzində hava şəraiti bölgələrdə 11 gündən 24 günə kimi yağıntılı keçib, əsasən şimal və şərq rayonlarında iqlim normanı dəfələrlə aşıb. Qusarda 3,2 dəfə, Qaxda 2,8 dəfə, Sabirabadda 2 dəfə çox olub.

N. Mahmudovun sözlərinə görə, Qubada aylıq norma 169%, Şəkidə 143%, Balakəndə 131%, Zaqatalada 118%, Gəncədə 111%, Gədəbəydə 117%, Cəfərxanda 106% müşahidə olunub.

Lənkəran-Astara zonasında isə nisbətən az yağıntı hava şəraiti qeydə alınıb və aylıq normanın 23-70%-ni təşkil edib.

"Dolu prosesi bu ilin iyun ayında keçən illə müqayisədə daha çox təkrarlanıb. Belə ki, ay ərzində 38 dəfə dolu düşüb, ötən il isə 18 gün olub.

Ən böyük dolunun diametri bu il iyunun 1-də Ağdamın Çəmənli və Sarıçalı kəndində 30-35 millimetr qeydə alınıb", - deyə o bildirib.
Xidmət rəisinin sözlərinə görə, yağan intensiv yağış nəticəsində çaylarda sululuq artıb, bəzi çaylardan qısamüddətli sel keçib.

İyun ayında 55 sel hadisəsi qeydə alınıb ki, bu da çoxillik müşahidələrə görə rekord göstəricidir.

Havanın əsasən qeyri-sabit keçməsinə baxmayaraq, Bakıda ay ərzində orta sutkalıq temperatur 24 gün normadan yüksək (1-5°) olub.

Bizim.Media