Çimərlik güləşçilərimiz Dünya Çimərlik Oyunlarına lisenziya qazandılar

Sinqapurda çimərlik güləşi üzrə dünya seriyasının ikinci mərhələsi keçirilib.

Bizim.Media xəbər verir ki, yarışda ölkəmizi üç güləşçi təmsil edib.

Rübail İbrahimli (70 kq) D qrupunda fransalı Kuentin Stikerlə (2:1) macarıstanlı Battulqa Raaşa (3:1) qalib gəlib, çinli Şiyian Jouya (1:1) sonuncu xal prinsipinə əsasən uduzub. Həmyerlimiz dörddəbir finalda gürcüstanlı Levan Kelexsaşviliyə 1:3 hesabı ilə məğlub olub.
Turnirdə 90 kiloqram çəki dərəcəsində çıxış edən İbrahim Yusubov (90 kq) A qrupunda rumıniyalı Mihay Palagiya (3:1), belçikalı Yonas Van Kaenegem (3:0) və pakistanlı Muhammad İnamı (3:0) üstələyib. Yarımfinalda türkiyəli Mahmut Özkaya (2:6) ilə bacarmayan təcrübəli güləşçimiz seneqallı Sini Sembeneyə (4:0) heç bir şans tanımayaraq bürünc medala sahib çıxıb.

Oyan Nəzəriani (+90 kq) A qrupunda gürcüstanlı Mamuka Kordzayaya minimal fərqlə uduzub – 0:1. Güləşçimiz serbiyalı Maqomedqadji Nurasulov (3:1) və yaponiyalı Masayuki Amanoya (3:0) qalib gəlsə də, qrupdan çıxa bilməyib.

Qeyd edək ki, bu mərhələ Dünya Çimərlik Oyunlarına lisenziya xalları verən sonuncu yarış olub.

Beləliklə, avqustun 10-11-də İndoneziyanın Bali şəhərində keçiriləcək Dünya Çimərlik Oyunlarında ölkəmiz çimərlik güləşində 70, 80, 90 və +90 kiloqram çəki dərəcələrində iştirak hüququ qazanıb.

Bizim.Media