Bəstəkar-müğənni Murad Arif solo konsert öncəsi hit olan “Brilyantlar” bəstəsini yeni ab-havada təqdim edib.
Bizim.Media xəbər verir ki, sözügedən nəğməni arabesk-oriental janrda səsləndirən sənətçi, həmçinin bu mahnı üçün kamera qarşısına keçib.
“Bu mahnının ilk ifaçısı Nura Suri olub. 12-13 il öncə oxuyub. Mahnı hələ də sevilir, sağlam səslənir. Amma o mahnının bu mahnıdan bir fərqi var. O, bir qadının münasibətidir. Deyir ki, əgər bir kişi yanımda olmaq istəyirsə, səxavətli olmalıdır, əlini cibinə atmalıdır, brilyantları başımdan tökməlidir. Bu isə sevgilisi üçün səxavətli olan kişinin mahnısıdır. Nuranın versiyası səxavətli kişiyə mesaj idi, bu isə ona cavabdır”, - deyə Murad vurğulayıb.
Ekran işinin rejissorluğunu müğənni Delee Orucluya həvalə edib. Bir-birindən fərqli üç obrazda çıxış edən Murad klipdə nəğmənin ilk ifaçısı Nura Suriyə də yer ayırıb..
Xatırladaq ki, sözügedən bəstəni Nura Suridən sonra Xalq artisti Brilliant Dadaşova da oxuyub.
Qeyd edək ki, Murad Arif mayın 19-da ölkənin əsas səhnəsi “Heydər Əliyev Sarayı”nda canlı solo konsert proqramı ilə çıxış edəcək.
Rəşad Əliyev, Bizim.Media
