Qadın sığınacaqlarında tələb olunan yerlərin 58 %-i çatışmır - HESABAT 

Qadın sığınacaqlarında tələb olunan minimum sayda yerlərin 58%-i hələ də çatışmır. 

Bizim.Media xəbər verir ki, bu, "Qadınlara qarşı zorakılıq və məişət zorakılıq işləri üzrə mühafizə orderləri: beynəlxalq standartlar və Azərbaycanın milli təcrübəsi" adlı hesabatda əksini tapıb. 

Ailə Qadın və Uşaq Problemləri üzrə Dövlət Komitəsi və Avropa İttifaqının birgə hazırladığı sənəddə qurbanların ədalət mühakiməsinə çıxışının ilk şərti kimi onlar üçün xidmətlərin göstərilməsi ilə bağlı tövsiyələr verilib. 
Hesabatda bildirilib ki, qurbanların tibbi sığorta, maliyyə yardımı, mənzil təminatı və məşğulluq kimi ümumi xidmətlər vasitəsilə dəstəklənmək hüququ və bu sahədə məlumatlar bütün qurbanlar üçün əlçatan olmalıdır: "Qadın sığınacaqlarında yerlərin sayını artırmaqla bütün qurbanlar üçün təhlükəsiz yaşayış və dəstək hüququ yaradılmalıdır. Belə ki, hazırda tələb olunan minimum sayda yerlərin 58%-i hələ də çatışmır. Cinsi zorakılıq va zorlama qurbanı olan qadınlar üçün mərkəzlərin yaradılması təklif edilib". 

Həmçinin qadınlara qarşı zorakılığın və məişət zorakılığının bütün qurbanları va onların uşaqları üçün ixtisaslaşdırılmış xidmətlər təklif edə bilmələri üçün qadın QHT-lərinin kifayət qədər maliyyələşdirilməsi tövsiyə olunub. 
Digər tövsiyələr qadınlara qarşı zorakılıq qurbanları üçün 24/7 rejimində çalışan yardım xəttinin mövcud olmasını təmin etmək üçün maliyyələşdirmənin artırılması, dəstək xidmətlərinə çıxış əldə etməkdə çətinlik çəkən qurbanlara dəstək olmaq üçün sayyar xidmətlərin təşkili, qaynar xəttə zənglərin hər kəs üçün ödənişsiz olmasını təmin etmək üçün dövlət orqanları ilə mobil operatorlar arasında əməkdaşlıq protokollarının işlənib hazırlanması, salahiyyətli orqanların uzun sürən prosedurları və qurbanlarda vəsait çatışmazlığı səbəbindən mühafizədə boşluqların yaranmaması üçün sənədləri olmayan qadınların sənədlərinin dublikatlarını ödənişsiz almasını təmin etmək məqsədilə prosedurlarin sürətləndirilməsi daxildir.

Bizim.Media