Binəqədidə içməli sudan uçotsuz və sayğacdankənar istifadə halları aşkarlandı

"Azərsu" ASC Bkının Binəqədi rayonunda içməli sudan uçotsuz və sayğacdankənar istifadə halları aşkar edib. 

Bizim.Media xəbər verir ki, bu barədə  qurumun məlumatında bildirilib. 

Aparılan araşdırmalar nəticəsində məlum olub ki, Binəqədi qəsəbəsi Fərman Məlikov küçəsində tikilməkdə olan çoxmərtəbəli yaşayış binasının suya olan tələbatı yaxınlıqdan keçən şəbəkəyə özbaşına qoşulmuş xətt vasitəsilə aparılır. Tikintinin sahibi texniki şərt almadan və “Azərsu” ASC ilə müqavilə bağlamadan sudan qanunsuz istifadə edir. 

"Binəqədi kəndində “mal bazarı” kimi tanınan heyvan kəsimi və satışı obyektində də sudan qanunsuz istifadə edildiyi aşkarlanıb. İnzibati və maarifləndirici tədbirlərin aparılmasına baxmayaraq obyekt sahibi su satışı müəssisəsi ilə müqavilə bağlamaqdan imtina edir. 
Xocəsən qəsəbəsində yük avtomobillərinin yuyulma məntəqəsinin müqaviləsi və sayğacı olsa da, obyektin istehlak etdiyi suyun bir hissəsi sayğacdankənar çəkilmiş qanunsuz xətt hesabına təmin olunurmuş. Rayon sukanal idarəsinin əməkdaşları qanunvericiliyin tələblərinə uyğun olaraq dəymiş ziyan aktı tərtib edərək həmin xətti ləğv edib. 

Binəqədi rayon Sukanal İdarəsi tərəfindən həyata keçirilən nəzarət tədbirləri zamanı fərdi sahibkara məxsus 12 mənzildən ibarət yeni tikilinin hər bir mənzilinə qanunsuz şəkildə su xətti çəkildiyi məlum olub. Yaxınlıqdan keçən su xəttinə 32 mm-lik boru birləşdirilərək, içməli sudan qanunsuz istifadə edilirmiş. Dərhal əraziyə qəza-bərpa xidmətini cəlb edib, qanunsuz çəkilən xətlər ləğv edilib", - məlumatda deyilir. 

"Azərsu" bildirir ki, aşkarlanmış faktlarla bağlı fərdi yaşayış evlərinin və obyektlərin sahiblərinə su şəbəkəsinə qanuni qoşulma ilə bağlı məlumatlar verilib:

"Eyni zamanda bildirilib ki, içməli sudan qeyri-qanuni və israfçılıqla istifadə edilməsi şəbəkələrdə hidravliki rejimlərin pozulmasına, ciddi su itkilərinə, həmin ərazilərdə yaşayan digər sakinlərin su təchizatının pisləşməsinə səbəb olur. Belə qanunsuz halların qarşısını almaq üçün tədbirlər mütəmadi davam etdiriləcək, özbaşına çəkilmiş və sayğacdankənar xətlər ləğv olunacaq, belə halları təkrar törədənlərlə bağlı hüquq-mühafizə orqanlarına müraciət ediləcək". 

Bildirilir ki, ötən il içməli sudan qanunsuz istifadə ilə bağlı “Azərsu” ASC tərəfindən 10 525 fakt aşkarlanıb. Həmin hallar üzrə 2 milyon 724 min kubmetr həcmində sərfiyyat bərpa olunub.
Son bir ildə Binəqədi rayonunda aşkarlanmış 2 106 qeyri-qanuni istifadə hallarının qarşısının alınması nəticəsində 531 min kubmetr sərfiyyat bərpa olunub. Ötən il içməli sudan qanunsuz istifadə ilə bağlı 225 fakt araşdırılması üçün hüquq-mühafizə orqanlarına təqdim olunub. 

Bizim.Media