Bu gün Xalq artisti Pərviz Məmmədrzayevin yubiley ad günüdür. Aktyor 50 yaşını qeyd edir.
Bizim.Media Xalq artistinin özəl günündə onunla əlaqə saxlayıb, yeni yaşında arzularını, öyrənməyə çalışdı. Əməkdaşımızın “50 yaşın pantomimi necədir”, “hardan gəldi, hara gedir” sualına aktyor özünə xas maraqlı cavab verib:
“Hələ nə yol qət etmişəm ki, gələcək gözəl günlər hələ qarşıdadır. Necə deyərlər uzun, incə bir yoldayam”.
Şablon səslənsə də P.Məmmədrzayevin geriyə baxdıqda nədənsə peşman olduğu barədə soruşuram.
“Dünyada hər şey fanidir. Hərdən vacib olanları qoyub, fani bir şeyin arxasınca qaçmaq insanı həqiqətən peşman edir”.
Söhbətimizin davamında ona bir sualla da müraciət edirəm. Maraqlıdır, görəsən uzun bir yaradıcılıq yolu keçmiş bir insan olaraq, keçən günlərini qaytarsaydılar gələcək günləri qurban verərdimi?
“Yox, verməzdim. Ötən günlərimin maraqlı olmasına baxmayaraq, mən gələcəkdə Allahın mənə yazdığı qisməti görmək istəyirəm. Həm də keçmişdə mənim sənətim vardı, ancaq ailəm, balarım yox idi. Şükür Allaha indi gözəl ailəm, övladlarım var. Onların hər gözəl günlərinə şahid olmaq istəyirəm”.
Xalq artisti sənətə bir sevgi kimi baxdığını da qeyd edib.
“Əgər mən səhnəyə çıxanda o sevgimi həyata keçirirəmsə, onu tamaşaçılara ötürə bilirəmsə, mən artıq başqa heç nə lazım deyil. Allahıma şükr olsun ki, mənə cansağlığı verib və mən bu sevgimi davam etdirə bilirəm. Şükür heç kəsdən və heç nədən şikayətim yoxdur”.
Sonda aktyor gələcəkdə Don Kixot obrazını canlandırmaq istədiyini də qeyd edib. Xalq artistinə xoş arzularımızı çatdırıb söhbətimizi yekunlaşdırırıq.
Növbəti dayanacağımız onun dostlarının ünvanı olur. Pərviz Məmmədrzayeva olan arzularını eşitmək üçün onlarla əlaqə saxlayırıq.
Aktyor Azər Axşamın dostuna arzularını bu sözlərlə çatdırdı:
“Mən səhər dostumu təbrik etdim, ona bir daha buradan da arzularımı çatdırmaq istəyirəm. Pərvizə ən əsası cansağlığı arzu edirəm, insan üçün əsas nemət sağlamlıqdı. Necə ki, övladlarını böyüdüb boya-başa çatdırıb, Allah ona nəvələrinin də xoş günlərini görmək nəsib etsin”.
Xalq artisti, Azərbaycan Dövlət Pantomima Teatrının yaradıcısı və baş rejissoru Bəxtiyar Xanızadə də Pərviz Məmmədrzayevə səmimi təbriklərini çatdırıb.
“Pərviz həm mənim tələbəm olub, həm də uzun illər bizim teatrımızda çalışıb".
Teatrın inkişafında böyük rolu olub. O, çox istedadlı bir insandır. Bu mənim üçün bir az həm də kədərlidir, cocuq bildiyim tələbələrim artıq 50 yaşına çatıblar.
"Arzu edirəm ki, bundan sonra da Allahın verdiyi ömrünü uğurlu, yaradıcılıq naliyyətləri ilə yaşasın. Uzun illər Azərbaycan teatrının tamaşaçılarını sevindirsin”.
Azərbaycan Dövlət Kukla Teatrının baş rejissor, aktyor Qurban Mənsimov isə fikirlərini belə izah etdi:
“Bu gün Pərviz ömrünün 50-ci ilini başa vurub, növəti yazını qarşılamaq üzrədir. Ona əsas cansağlığı arzu edirəm. Pərviz çox fədakar insan, əzmkar aktyordur. O, nail olduqlarına öz zəhməti, alın təri ilə nail olub. Mən ona yaradıcılıq uğurları, ailə səadəti arzulayıram. Pərviz gözəl dostdur. Mən çox sevincliyəm ki, həyatımda Pərviz kimi dostum, sənət yoldaşım var”.
Teatrşünas, jurnalist Vəli Əkbər də öz tələbəlik dostu haqda ürək sözlərini bizimlə bölüşdü:
“Pərviz gözəl və böyük sənətkardır. Pantomim kompozisiyada onun yaratdığı bir “Maestro” obrazı var, oynadığı rollara baxanda, nəsə mənə elə gəlir ki, Pərviz əsərlərdəki obrazları elə sinəsinə sıxaraq onlara toxunmadan ustalıqla yaradır.
Onun plastikası, biomexanik imkanları məni feyziyab edir. Pərviz qəlibdə yaratdığı rollara ruh üfürərək onları obraza çevirə bilən sənətkardır. Əgər Pərvizi, 50 ilin insanını bir pantomim ifadə ilə təsvir etsəydim, onu gülümsər dua edən adam obrazında görürəm.
Dostumu, şirin tələbəlik illərimin yadigarını təbrik edirəm. 50 bir etapdır, bundan sonra oddan, sudan, havadan, torpaqdan çəkib yığa bildiyini artıq müdrik şəkildə geri qaytaracağın bir mərhələyə daxil olursan. Pərvizə bitirdiyini qorumağı, daxil olduğu növbəti mərhələni uğurlu, sağlıqlı və verimli yaşamağı arzu edirəm”.
Vüsalə Balayeva, Bizim.Media
