Bakı İstintaq təcridxanasında kamera yoldaşını döyməkdə ittiham olunan Vətəndaş və İnkişaf Partiyasının (VİP) həbsdə olan sədri Əli Əliyevin cinayət işi üzrə məhkəmə araşdırması başa çatıb.
Bizim.Media xəbər verir ki, Sabunçu Rayon Məhkəməsində hakim Anar Rzayevin sədrliyi ilə keçirilən prosesdə hökm elan olunub.
Hökmə əsasən, Əli Əliyev verilmiş ittihamla təqsirli bilinərək 3 il 6 ay müddətinə azadlıqdan məhrum edilib.
11.34 ***
Vətəndaş və İnkişaf Partiyasının (VİP) həbsdə olan sədri Əli Əliyev barəsində cinayət işi üzrə məhkəmə prosesi keçirilib.
Bizim.Media xəbər verir ki, Sabunçu rayon Məhkəməsində hakim Anar Rzayevin sədrliyi ilə baş tutan prosesdə prokuror çıxış edib.
Prokuror Əli Əliyevin 4 il müddətinə azadlıqdan məhrum edilməsini istəyib.
MÖVZU İLƏ BAĞLI:
Əli Əliyev barəsində yeni cinayət işi üzrə məhkəmə başlayır
İstintaq orqanı tərəfindən Əli Əliyevə qarşı Cinayət Məcəlləsinin 127.2.3 (qəsdən sağlamlığa az ağır zərər vurma - ümumi təhlükəli üsulla və ya xuliqanlıq niyyətilə törədildikdə) maddəsilə ittiham irəli sürülüb.
Əli Əliyev Bakı İstintaq Təcridxanasında onunla eyni kamerada saxlanılan başqa bir dustağı döyüb, ona xəsarət yetirməkdə ittiham olunur.
Cinayət işi üzrə Nəzərov Zabit İmanxan oğlu zərərçəkmiş şəxs qismində tanınıb.
Qeyd edək ki, 2022-ci ilin yanvarından iyununa qədər Əli Əliyevə üç dəfə hökm oxunub. VİP sədri birinci dəfə yanvarın 13-də Yasamal rayon Məhkəməsinin hökmüylə məhkum edilib. Ona Dövlət Sərhəd Xidmətinin polkovniki Emil Cəfərovun iddiası əsasında CM-in 147.1 (böhtan) maddəsilə 5 ay həbs cəzası verilib.
Bir müddət sonra DSX-nın başqa bir zabiti Ramin Cəbrayılovun iddiası əsasında Əli Əliyev eyni maddə ilə təqsirli bilinib. Əvvəlki cəzası da birləşdirilməklə üzərində qəti olaraq, 6 ay həbs cəzası saxlanılıb.
Əli Əliyev 2021-ci il noyabrın 30-da qəzaya uğramış Dövlət Sərhəd Xidmətinə (DSX) məxsus helikopterdən sağ çıxdığı iddia olunan bu iki nəfərin hadisə vaxtı vertolyotda olmasına inanmadığını deyib. Buna görə həmin şəxslər ona qarşı xüsusi ittiham qaydasında iddia qaldırıb.
Eldar Məmmədli, Bizim.Media
