“Cəlal Əliyev gözünü qırpmadan Heydər Əliyev üçün ölümə gedib”

Moderator.az YAP-ın qurucularından olan texniki elmlər doktoru, professor Əli Nağıyevlə müsahibənin ikinci hissəsini təqdim edir:

 (Oxucuların diqqətinə-Müsahibənin əvvəlini mayın 2-də 10.22 bölümündəki xəbər lentindən tapmaq olar)

Hər kimdə bir hünəri görüb tərif etməsən,

Onun hünər gövhəri düşər itər əlindən.

Kimsədə bir qüdrəti görüb vəsf etsən əgər,

Onun qüdrət çeşməsi birə-beş qüvvətlənər.

-Niyə məhz 91 nəfər? Bu siyahını 100-ə çatdırmaq mümkün olmadımı?

-O 91 iki gün geciksəydi ola bilərdi ki, siyahıda 130 adam olsun. Yaxud o siyahını iki gün tez çap etsəydik ola bilərdi ki, 91 yox, lap 81 nəfər olardı. Yəni 91 nəfərlik siyahı çap olundu deyə o rəqəm bir simvol kimi tarixə düşdü. Dedim axı, bu, görülən məqsədyönlü işlərdən biri idi. Sonradan Ali Sovetin sessiyasını çağırmağa bəs edən sayda deputatların müraciətinə imzaların yığılması və qəzetlərdə çap olunması daha böyük əks-səda yaratdı.

-Həmin siyahıda elə adamın adı vardı ki, sonradan vay-şivən qopararaq ordan adını çıxartdırsın?

-Onu dəqiq yadıma sala bilmirəm. Ancaq onu dəqiq bilirəm ki, siyahıda adı olmasından xəbəri olmayan adamlar vardı. Həmin siyahı indi qarşımda olsaydı, deyə bilərdim ki, bunun icraçıları kimlər olub. Yəni 7-8 nəfər vardı ki, bu siyahının tərtib edilməsinin icraçıları idi.

-Ali Sovetin keçmiş sədri Yaqub Məmmədov da iddia edir ki, adı həmin “91-lər”in siyahısında olmasa da o da bir neçə adamın adını ora tövsiyyə edib.

-Mən o ərəfədə iki dəfə Yaqub Məmmədovla görüşmüşəm. Sonralar Abşeronun polis rəisi olmuş Cahangir Hüseynov Yaqub Məmmədovla Tibb Universitetindəki kafedrasında görüşü təşkil etmişdi. Birinci dəfə mənə “teoriya” danışmağa başladı. Dedi ki, Dağlıq Qarabağ münaqişəsi çox mürəkkəb məsələdir və Heydər Əliyev gəlib bunu necə həll edəcək? Mən də ona etiraz etdim ki, ay kişi, sən Ali Sovetin sədri olmusan və akademiksən, Heydər Əliyevin də sənin bu mərtəbəyə çatmağında xidmətləri olub. Yəni istəyirdim Yaqub Məmmədov da getsin desin ki, a kişi, keçmişdə nə olub, olub, bu gün sənsən və biz də səni dəstəkləyirik. İkinci görüşümüzdə isə mənə dedi ki, burdan getsəm, görərlər, mən “çerez” Türkiyə gedəcəyəm. Mən getdim onun bu sözünü Heydər Əliyevə dedim. Heydər Əliyev də dedi ki, eybi yox, Türkiyədən gəlsin. Ancaq Yaqub Məmmədov getmədi. Bilirsiniz, tarix düz yazılmalıdır və hər kəsin etdikləri və etmədikləri orda qeyd edilməlidir. Bu gün mən də sağam, Cəlal Əliyev, Yaqub Məmmədov və Ağabəy də sağdır. Qoy durub mənə desinlər ki, filan şeyi düz demirsən. Sizinlə keçən dəfəki müsahiubədən sonra bir nadan dınqıldanmışdı, ancaq mən o nadana cavab verməyi özümdən çox aşağı hesab edirəm.

-Hər il mayın 10-da Heydər Əliyevlə bağlı ilk olaraq nələri xatırlayırsınız?

-İlk dəfə Heydər Əliyevlə görüşəndə 38 yaşım vardı. Özü də mən həyatım boyu hansı dəyərli kişiylə bir yerdə çalışmışamsa, onlardan mənim xarakterimdə dərin izlər qalıb. Universitetdə Tofiq Bektaşi vardı, Heydər Əliyevin də müəllimi olmuşdu, əsl alim, gözəl müəllim idi. Bəzən onu və məni tanıyanlar mən danışarkən deyirlər ki, aha, filan yeri Tofiq müəllim kimi dediniz. Azad Xəliloviçlə münasibətim də o cümlədən. Birdən mənə deyirlər ki, lap Azad müəllim kimi danışırsan. Mən 4 il Leninqradda yəhudilərin arasında çalışdım. Orda da çox böyük alimlər vardı və onlar həm də çox gözəl insan idilər. Ancaq 38 yaşımdan sonrakı hansı Əli Nağıyevəmsə, hər bir nailiyyətim üçün Heydər Əliyevə borcluyam. Nəyə müvəffəq olub-olmamağım ayrı bir şeydir. Yəni mənəviyyatı zəngin olan, sözün qədrin-qiymətin bilən adamla həmsöhbət olmaq insanın formalaşması üçün bir məktəb rolunu oynayır. Mən hər görüşümdə Heydər Əliyevdən çox böyük mənəvi qida almışam. Heydər Əliyev tarix quran kişiydi.

-Tarix onun haqq etdiyi qiyməti verə bildimi?

-Hələ sağlığında Heydər Əliyev özünə öz qiymətini verdi və o sağlığında tarix yaratdı və özünü də həmin tarixə yazdı. Tarixin verdiyi qiymət nə idi? Bzezinski kimi bir siyasət uzmanı Heydər Əliyevin böyük siyasət adamı olduğunu deyirsə, məgər bu, tarixin verdiyi qiymət deyil? Bir epizod danışmaq istəyirəm və bununla göstərmək istəyirəm ki, bəzilərinin iddia etdiyi kimi bu günki Azərbaycan göydən torbayla düşməyib, bu dövlət zərrələrdən yığılıb və bunun yolunu da, siyasətini də, icrasını da Heydər Əliyev edib. 1994-cü ildə Heydər Əliyevlə İslam Konfarnsı Təşkilatının toplantısında iştirak etmək üçün nümayəndə heyətinin tərkibində Kasablankaya getmişdim. Hava çox isti idi və iclaslar axşamüstü saat 4-5 radələrində başlayırdı, səhərlər isə Heydər Əliyev ora gələn böyük dövlət adamlarıyla görüşlər keçirirdi. Bunlardan biri də İordaniya kralı Kral Hüseyn idi. Görüş başlayandan sonra hal-əhval tutuldu və birdən Heydər Əliyev qayıtdı ki, ermənilər sizin vətəndaşlarınızdı, onlarla bağlı mən sizə bir şey demək istəmirəm, amma bilirəm ki, Klinton sənin dostundur, hər dəfə görüşəndə elə bir-iki kəlmə bizim haqqımızda yaxşı sözlər desən, bu da bizə qardaş xidməti olar. Bununla ona başa saldı ki, ermənilərin ipin çəkmək lazımdır. Yaxud Bakı-Ceyhanla bağlı İstanbulda saziş imzalanma mərasimini yada salın. Klinton Heydər Əliyevin solunda oturmuşdu, Heydər Əliyevin sağında Süleyman Dəmirəl, onun sağında isə Nazarbayev. Heydər Əliyev çıxışında deyir ki, hər dəfə Türkiyəyə gələndə məndən soruşurdular ki, Bakı-Ceyhan nooldu, mən də deyirdim ki, olacaq, olacaq, olacaq. İndi deyirəm, Bakı-Ceyhan oldu. Bu zaman Klintonun Heydər Əliyevə necə böyük heyranlıqla baxdığına fikir vermək lazım idi. Yəni bu epizodları görmək lazımdır. Yəni Heydər Əliyev bu dövləti qurmaq üçün nə qədər ağır və məşəqqətli yollardan keçib. Ona görə də Heydər Əliyevlə yan-yana olmaq qanan adam üçün dünya idi. .

-Belə çıxır ki, Heydər Əliyev “xəzinə”sindən Sizdən çox götürən olmayıb.

-Bilirsiniz, mən də mələk deyiləm. Mən də pul qazanmışam, ev tikdirmişəm, balalarımı oxutmuşam. Yəni bütün bunların hamısın tərəzinin bir gözünə qoy, Heydər Əliyevlə yan-yana olub mənalanmağı isə qoy tərəzinin o birisi gözünə. Fərq rəhmətlik Adil İsgəndərov demişəkən, odu ey...(əliylə qollarını aşağıdan yuxarı açaraq göstərir)

-Fəxri Xiyabana tez-tezmi gedirsiniz?

-İldə iki dəfə gedirəm, Heydər Əliyevin doğum və ölüm günlərində.

-Səhər heç kim gəlməmiş gedirsiniz ki, izdiham gələnədək hamıdan qabaq vəfa borcunuzu verəsiniz?

-Yox, yox, mən mayın 9-da və 11 dekabrda gedirəm.

-Niyə,  o izdihama görünmək istəmirsiniz? Sizə xəyanət etmiş simaları görməmək üçünmü?

-Bilirsiniz, dünyada xeyir də var, şər də. Mən ora kiməsə özümü göstərmək üçün getmirəm. Ora gedirəm “Fatihə”ni verib, o böyük dahinin ruhuna ehtiramımı bildirirəm, gülümü qoyub gəlirəm. Nəsimidən bayaq dediyimiz bu sözlər lap yerinə düşdü:

Həqiqət haqqı biləndir verən malını yəğmayə,

Taraş olub nəməd deyən düşəmmədi bu sevdaya.

Səfasız sufiyi gör ki, həram der, dinləməz sazı

Ki əhl-həqq olan kişi, nə qəm girsə kəlisayə.

Yəni get bir gündöyən yerdə daşın üstündə otur və Allahınla danış. Allahınla ürəyində danışmağın üçün sənə vasitəçi lazım deyil. Mənim də Heydər Əliyevdən aldığım bu mənanın təşəkkürünü ona bildirməkdən ötrü orda mənim ətrafımda adam lazım deyil. Ya qardaşımla, ya oğlumla gedirəm, ziyarət edib gəlirəm.

-Bu gün bir bayağılaşmış dəb formalaşdırılıb ki, az qala hər bir məmurun yaxasında Heydər Əliyevin imzası olan nişanlar gəzdirirlər, Heydərçi olduqlarını sanki gözə soxurlar. Amma çox vaxt bunlar camaatda ikrah doğurur ki, axı sən nə vaxtdan Heydərçi oldun...?

-Sən özün dedin də. Mən daha nə əlavə edim? Heydər Əliyevin vəfatının birinci ildönümündə Rəşid Behbudov adına Mahnı Teatrında çıxışım olub. Orda demişəm ki, bu gün hər yerdə Heydər Əliyevin heykəlini qoyurlar, bunlar onun halal haqqıdır, amma Heydər Əliyev sağlığında özünün yüzlərlə, minlərlə heykəlini qoyub və bu Azərbaycanı yaradıb. Sözsüz ki, hər bir məscidi tikəndə orda Məhəmməd Peyğəmbərə-bu dini gətirən adama ehtiram var. Amma bu məsələni o ucuz adamların iyrənc istəklərini həyata keçirmək taktikasına çevrilməsinə yol vermək olmaz. Pasternakın bir sözü var: “Vsyakiy stadnost pribejişe neodaryonnost, xot budet vernost Leninu, xot budet vernost Kantu, xot budet vernost Marksu.” Yəni dəyərli adamları uca olanlar ucalda bilər. Peğəmbərin də belə bir Hədisi var: “Təbliğatda məqsədin özünü insanlara sevdirməkdirsə, çalış təbliğatçıların xalqın sevdiyi adamlar olsun.” O siz dediyiniz yaxasında nişan gəzdirənlərin də içərisində ürəkdən Heydər Əliyevi sevənlər var. Həsən Zeynalov o nişanı taxırsa, ona yaraşır. Ağabəy Əsgərov, Zahid Qaralov o nişanı taxırsa,onlara yaraşır.

-Amma bu gün 4 partiya dəyişənlərin Heydərçi statusuyla zühur etməsi adamın ürəyini bulandırır...

-Mən axı bu sualına nə cavab verim? Vaxtilə Universitetin rektoru Mirabbas Qasımov Heydər Əliyevə müraciət məktubu hazırlamışdı. Məğzi də ondan ibarət idi ki, niyə Mütəllibova mane olursan, onu işləməyə qoymursan? O universitetin Naxçıvandan olan ziyalılarını həmin müraciətə imza atmağa məcbur edirdi. Qapı-qapı düşərək həmin bədnam müraciətə imza yığanlar bu gün millətin qabağında gedənlər olub. Bilirsən, elə məsələr var ki, hökmən deyilməlidir və hesab edirəm ki, komandanın içindən tənqidə meydan vermək lazımdır. Özü də hökmən. Bayaq Çörçildən misal gətirdim axı: “On obraşaet vnimaniye na nezdarovoye sostayaniye del”

-Siyavuş Novruzovun adın bir neçə dəfə çəkdiniz. Bu günlərdə onun bir uğursuz açıqlaması oldu. Amma mən dediyiniz həmin sistemdaxili tənqidlə bağlı bir yazı yazdım və orada Siyavuş Novruzovu təqdir etdim ki, yalnız o martın 17-də parlamentdə hökumətin hesabatında Artur Rəsizadəyə xitab etdi ki, biz qeyri-neft sektorunun inkişafından danışırıq, amma gəlin razılaşaq ki, ölkədə maykadan tutmuş corabadək hər şeyi xaricdən alırıq.

-Onun o bir cümləsi artıq hər şeyi açır. Bilirsən, Siyavuş təpədən dırnağadək Heydər Əliyevə və onun yoluna sədaqətli adamdır. Bir epizod deyim sənə. Bir dəfə 92-ci ilin payızında Həsən Zeynalov mənə zəng elədi ki, kişi zəng edib ki, İlham Əliyev Naxçıvana gələcək, onun yanına bir adam qoşmaq lazımdır. Heç tərəddüd etmədən dedim ki, Siyavuş Novruzov. Bilirdim ki, həm sadiqdir, həm də cəsarətli və eyni zamanda çüssəli. Və bu gün də o adam həmin sədaqətində qalır. Mən 3 ildir Bakıdayam və bu adamların heç biriylə hər hansı əlaqəm yoxdu. Amma mən haqqı dana bilmərəm.

-Deyilənə görə Fikrət İsmayılov bərk xəstədir. Heç onu ziyarət etməmisiniz ki?

-O dializdən keçir, amma işə də gəlir. Onunla görüşməyimiz çox az-az olur, amma telefonla tez-tez hal-əhval tuturuq. Bilin ki, Fikrət İsmayılov etalon təmiz bir adamdır və o bütün addımlarını ürəkdən eləyir.

-Amma onun Tağı Əhmədov kimi müavini də var...

- Tağı Əhmədov da lazımdır.

-Eşitdiyimə görə partiyanın rayon təşkilatının sədri olan dostlarınızı da onlara söz gəlməsin deyə ziyarət etmirsiniz...

-Bilirsən, sözsüz ki, YAP-da ürəyim istəyən yaxşı kişilər çoxdur, yenə deyirəm, o iblis xislətli məkrli adamlara cəfəngiyyat uydurmağa daha fürsət vermək istəmirəm. Oturmuşam evimdə, kitabımı oxuyuram, öz işlərimlə məşğul oluram.  Axı bayaq mən Eynulla ilə bağlı məsələni dedim.

-Bəlkə Eynulla haqqında deyilənlər doğru imiş. Nəzərə alın ki, o bir neçə dəfə səngər dəyişib...

-Bilirsən, Heydər Əliyevlə çox açıq söhbətimiz oldu bu barədə. Ona dedim ki, bilirsiniz necədi, bu adam savadlıdır, mən də istəmişəm ki, bu cür adamlar bizim olsun. Eyni zamanda savadlı adamı idarə etmək də çətindir, gərək o özü bu yola əqidə ilə bağlana ki, sabit qədəm ola. Özü də o vaxt cavan və emosional idi. Nə isə...

-Bayaq dediniz ki, prezident bir yox, ən azı 5 mənbədən informasiya alır. Necə ola bilər ki, həmin 5 mənbənin hamısı Əli Nağıyevlə bağlı prezidentə ancaq neqativ şeyləri desinlər?

Əli Nağıyev çoxları üçün heç vaxt asan adam olmayıb. Özü də heç vaxt çalışmamışam ki, hamının xoşuna gəlim. 1993-cü ilin sentyabrın sonlarında, hansı ki, Heydər Əliyev hələ prezident seçilməmişdi, Ali Sovetdə çox dar bir “kruq”da-mən, Lalə Şövkət, Rəfael Allahverdiyev, Arif Rəhimzadə və daha bir-iki nəfər Heydər Əliyevin yanında idik. Orda daxili işlər naziri Vaqif Novruzov haqqında çox kəskin çıxış etdim. Mən onun bir neçə yaramaz əməllərini bilirdim və bu barədə hər yerdən məlumat alırdım. Ayağa durub dedim ki, Heydər Əliyeviç, bu cür adam necə sizə sədaqətlə xidmət edə bilər? Heydər Əliyev heç nə demədi, dedi otur. Gəldim partiyaya, bu zaman mənə Heydər Əliyev zəng elədi. Dedi bilirsən nə var, dediklərini mən də bilirəm, ancaq qoy bunu da özümüzə düşmən etməyək görək başımıza nə gəlir. Məəttəl qaldım ki, ay kişi, bu sözü orda mənə niyə demədi? Axı onun yanında cəmizi 5-6 adam idik. Səhərisi gün Vaqif Novruzov qardaşım Nazimi çağırdı yanına ki, sənin qardaşın məndən nə istəyir? Deməli, bu sözü orda oturanlardan kimsə gedib çatdırdı. Yəni Heydər Əliyev hamını tanıyırdı deyə, orda mənim sözümə cavab vermədi ki, gedib deyəcəklər. Yəni dedim axı, mən asan adam olmamışam..

-Ona görə də hər zaman Sizi sıradan çıxarmaq istəyən bədxahlar olub...

-Mən 99-cu ildə partiyanın qurultayında hesabat vermişəm. Onda partiyanın 140 min üzvü vardı. Amma mən partiyaya qəbulun qarşısını kəsirdim. Qoymurdum dünəni qaranlıq və ya naməlum olanların partiyaya gəlişini. Heydər Əliyevin də özü deyirdi ki, əlimlə böyütdüyüm adamların bir çoxu dar ayaqda məni satdı. Ancaq bu gün dalımca heç vaxt tanımadığım adamlar gəlir. Mən belələrini yaxına qoymurdum.

-Onda belə çıxır ki, bu günədək hələ də YAP sədrinin müavini olsaydınız 600 min üzvünüz olmazdı, uzağı 300 min olardı...

-Mən də elə hesab edirəm ki, indiki qədər olmazdı. Bayaq Pasternakın sözün dedim sənə. Mən yenə sənə deyirəm, prezident dünən Heydər Əliyev idi, bu gün İlham Əliyev. Azərbaycan dövləti, Azərbaycan xalqı və prezidentinə üçünə bir yerdə ən çox sədaqətli olan adamlardan biridir Əli Nağıyev.

-Heydər Əliyevin arzusu bu günki Azərbaycan idimi?

-Əgər bu gün Amerika Azərbaycanı özünün strateji müttəfiqi adlandırırsa, bundan artıq Heydər Əliyev nə istəyirdi? Azərbaycan BMT TŞ-ın üzvü oldu, bundan artıq nə istəyə bilərdi? Əhatəmizdəki bu qədər dövlətlər varkən Birinci Avropa Oyunları Bakıda keçiriləcəksə, axı bu çox böyük nailiyyətdir. Bütün bunlar əminliklə onu söyləməyə əsas verir ki, Heydər Əliyevin arzu etdiyi məhz bu günki Azərbaycandır və özündən sonra qoyub getdiyi layiqli varisdir. Amma sözsüz ki, çatışmazlıqlar da var, sözsüz ki, onlar tənqid olunmalıdır, özü də komandanın içindən tənqid olunmalıdır ki, rəqiblərin əlinə fürsət verməyəsən.

-Komandanın içindən gözü çıxmış qardaşlarından ibrət götürüb qorxularından kimsə heç nə deməyə cəsarət etmir axı...

-Baxır nöqsanı kim deyir. Yəni bu adamın o nöqsanı dilə gətirməyə mənəvi haqqı çatır, ya yox. Sözsüz ki, Xadarkovskinin, Berezovskinin Putini korrupsiyada günahlandırması ən azı gülüncdür.

-Bir neçə suala da Sizdən diplomat kimi cavab istəyəcəm. Ukraynada baş verənlər Azərbaycana nə dərəcədə təsir edə bilər?

-Hesab edirəm ki, Ukraynada baş verən olaylar Azərbaycana mənfi təsir göstərə bilməz. Çünki ölkə prezidenti İlham Əliyev Azərbaycana tuşlanan siyasi maraqları zamanında dəqiq qiymətləndirərək balanslaşdırılmış xarici siyasət həyata keçirir. Xüsusən də Avropa İttifaqı, ABŞ və Rusiya ilə münasibətlərdə çox həssas məqamlar nəzərə alınmaqla aparılır. Konkret olaraq Ukraynada baş verən xoşagəlməz olaylara gəldikdə isə, bu siyasət Kuçmanın da, Yuşşenkonun da vaxtında eyni olub. (bax Bzezinskinin kitabına) Ancaq bu hadisələr o zaman baş vermədi, indi siə qaçılmaz oldu. Deməli, doğrudan da böyük Cavid demişkən,

İdrakı sönük başçıların qəfləti ancaq

Etmiş, edəcək milləti həp əldə oyuncaq

Burada yenə də rəhmətlik Əbülfəz Elçibəy yadıma düşdü. Yanukoviç müxalif qüvvələrin qarşısında heç bir ay da duruş gətirə bilmədi. Xalqı pis günə salıb qaçdı.  Əbülfəz Elçibəysə sonadək Azərbaycanı dağıtmaq istəyən məkrli xarici siyasətin qarşısında dayandı, Heydər Əliyevin arxasınca gec də olsa təyyarə göndərdi. Heydər Əliyev gəldi və məhv olmaq təhlükəsiylə üz-üzə qalan Azərbaycanı xilas elədi.

-Cəlal Əliyevlə necə, zəngləşirsinizmi heç olmasa?

-Yox, heç bir əlaqəmiz yoxdur. Amma insaf naminə deyim ki, əgər Heydər Əliyevin batmaqda olan “Azərbaycan” adlı gəminin sükanı arxasına keçməsində ayrıca bir şəxsiyyətin əvəzolunmaz xidmətindən söhbət gedirsə, bu yalnız Cəlal Əliyevdir. Cəlal Əliyev bu yolda tarana gedib. Cəlal Əliyev Heydər Əliyevdən ötrü gözünü qırpmadan ölümə gedib. Bu dəqiqə məndə Cəlal Əliyevin öz əliylə yazdığı siyahı var ki, partiyanı yaratmaq prosesində, get filankəsin, filankəsin yanına. Mən bunların hamısıyla dəqiq əlaqədə olmuşam və faktlar əsasında danışıram.

-Putinin keçmiş SSRİ ərazisində yaşayan rusdilli əhaliyə Rusiya vətəndaşlığı verilməsi qaydalarının sadələşdirilməsi haqqında qanunu imzalamasından sonra çoxlarını bir sual düşündürür, bu adam enində-sonunda nə etmək istəyir?

-Rusiya dünya siyasətini müəyyən edən 3-4 dövlətdən biridir. Rusiya mövcud dünyada öz mövqelərini qoruyub saxlamaq üçün manevrlər etməyə cəhd edir. Bu, Rusiyanın öz getdiyi yol və seçdiyi strategiyadır. Məncə biz “Rusiya nə etmək istəyir” sualına cavab axtarmaqla özümüzü yormaqdansa “biz hansı addımları atmalıyıq” sualını müzakirə etməliyik. Bu baxımdan prezident İlham Əliyevin xarici siyasət startegiyasının olduqca məzmunlu və zərgər dəqiqliklə hazırlanıb həyata keçirildiyini görmək lazımdır. Diqqətlə fikir verin, BMT-də Ukraynanın ərazi bütövlüyünə də tərəddüdsüz dəstək verdi, AŞPA da anti-Rusiya ovqatlı qətnaməyə də səs vermədi və qərarını əsaslandırdı ki, belə ədalətliydinizsə, illərdi Azərbaycan torpaqlarını işğalda saxlayan bir işğalçını niyə qovmurdunuz qurumdan? 

-Siz 2011-ci ildən boşsunuz və yaxud belə deyək ki, Xarici İşlər Nazirliyinin sərəncamındasınız.

-Belə demək olar. Sadəcə deyim ki, 2011-ci ildə ordan qayıdanda nazirlə görüşmüşəm, ondan sonra da heç vaxt heç bir qapını açmamışam, qanun necədirsə, o cür də mənə münasibət var. Mən Əli Nağıyevəm, prezidentə, Azərbaycana və millətə sədaqətimi saxlayıram və insanlara münasibətdə ikiüzlü deyiləm. Bu gün də mənim hər zaman fəxr elədiyim odur ki, 10 il akademiyada, 10 il də universitetdə işləmişəm, 10 il nazir, 5 il deputat, 4 ildən artıq səfir olmuşam. Amma Azərbaycanda bir adam yoxdur ki, onu görəndə başımı aşağı salam, yaxud üzümü yana çevirəm.

-Nəhayət, bir suala da cavab istəyim. Bu günədək SSRİ-nin dağılma prosesinə start veriləndən müstəqilliyin ilk illərinədək, oradansa YAP-ın hakimiyyətə gələrək ölkənin idarə edilməsində iştirakıyla bağlı tarixi faktlara və sənədlərə əsaslanan, gələcək nəsillər üçün əsl mənbə rolunu oynaya biləcək bir kitab oxumusunuzmu?

- Sözsüz ki, dəyərli kitablar da var. Ona haqqı çatıb yazan kişilər də var, amma saxta yolla ordan pul qazanmaq istəyənlər də çox oldu...

-Bəlkə bu ara boşluqdan istifadə edəb Azərbaycanın müasir tarixini oturub yazasınız?

-Ona sənin kimi bir oğlan lazımdır ki, oturaq, bunları əvvəldən axıra olduğu kimi yazaq.

-Biz deyək ki, 200-500 il bundan qabaq yazılmış tariximizdə baş verən bir çox gerçəkləri bilməməkdə haqqımız ola bilər, amma çoxumuzun gözünün qabağında baş vermiş tarixi dövrü olduğu kimi yazmamaq qəbahətdir.

-Axı bu gün hamımız sağıq və hər şey indiki nəslin gözləri önündə baş verib. Bu müsahibədə adını çəkdiklərimin 90 faizi sağdır. Sözsüz ki, dəqiq tarix hamıya lazımdır. Əks halda sonradan yenə tarixçi axtaracağıq...

Söhbətləşdi Zülfüqar Hüseynzadə